Čeavetjávrris govvejit sámegielat mánáidfilmmaid

Golmmabeaivásaš leairras  mánát besse jo vuossárgga veaigin sáimmastallat ja oaggut. Maŋŋebárgga sáimmastallama lassin lea maiddái nuohti geassin. Guollebivddu lassin mánát besset oahpásmuvvat nuortalaškultuvrii ja -gillii. Lágideaddji válljen temáid lassin mánát besset maiddái ieža hutkat filmmaid sisdoalu ja oassálastet rádioprográmma dahkamii. Nuohtigeassimis ledje lassin mielde Čeavetjávrri skuvllalaččat.

Leairra ulbmil lea láhčit sámegielat mánáide sámegiela giellageavahandilálašvuođa ja oahpásmuhttit eará sámegielaid hálli nuoraide. Filmmaid dahkama lassin mánáide oahpahuvvojit luonddus lihkadeami ja luonddu buktagiid ávkkástallama áššiid. - Seammás lea vejolašvuohta doarjut sámegielat mánáid-tv buvttadeami, lohká Meahciráđđehusa sámegielat dieđiheaddji Pentti Pieski.

Leairra filmmat čájehuvvojit Yle Sámi Unna Junná -mánáidprográmmas. Meahciráđđehus ávkkástallá maiddái ieš filmmaiguin, ja seammá maiddái Sámediggi. - Sámedikkis lea kuati.fi -prošeakta, man ulbmil lea almmustahttit jagi 2016 álggus neahttasiiddu, mas lea árabajásgeassinmateriála golmma sámegillii. Dát leaira doarju dán barggu, dadjá davvisámegielat plánejeaddji Maiju Saijets.

Dát lea juo goalmmát Meahciráđđehusa ordnen sámegielat mánáid ealligovvaleaira. Jagi 2013 leaira ordnejuvvui Anáris ja Leammis, mannan gease Jeagelveajis Ohcejogas. Leairra ovttasbargin leat Yle Sápmi, Sámediggi, Sámi oahpahusguovddáš ja Sámemusea Siida.

Filmmaid vuosttas eahket lea dán háve máddin, Turku girjemeassuin 2.10. Turku girjemeassuid temán lea dán jagi Sápmi ja Kustavi.

Lassidieđut:

Sámegielat dieđiheaddji Pentti Pieski, Meahciráđđehus, tel 040 7696 109 (davvisámegillii)

Luondduguovddáš Siidda divššár Kirsi Ukkonen, Meahciráđđehus, 0400 479 986 (anárašgillii)