Eurohpá kulturbirasbeaivvit Siiddas 18.-19.8.2014

Seainnihis musea – Siidda olgomusea mobiilavugiiguin!

Siidda geasuheaddji olgomusea sirdása ođđa áigodahkii duorastaga 18.9.2014 dbm 18.00, go olgomusea mobiilaoahpistanrusttegat váldojuvvojit atnui. Rahpandilálašvuohta álggahuvvo olgomusea boarráseamos čuozáhagas, Tirro šilljobirrasis. Ovdalgo mii oahpásmuvvagoahtit digitála oahpistanrusttegiidda, de beassat vuos návddašit ealli musihkas, go Heli Aikio loaiddasta. Válde fárrui fiehttotelefovdna dahje tableahtta - oaččut veahki mobiilaoahpistanrusttega geavaheapmái. Rahpandilálašvuhtii beassá nuvttá ja das guossohuvvojit bullákáfet!

Maid seainnihis musea dahje mobiilaoahpistanrusttet oaivvildit? Go don háliidat lávket ođđa áigodahkii, seainnihis museai, de dus galgá leat dán olgomuseagalledeami várás fiehttotelefovdna dahje tableahtta. Olgomusea vuođđooahpistanrusttegiid leat dievasmahttimin 12 čuozáhaga, mat leat ealáskahtton arkiivagovaiguin, videoiguin ja jietnamateriálaiguin. Dát čuozáhagat leat merkejuvvon galbbaiguin, main gávdnojit QR-kodat. Siidda vuosttas mobiilaoahpistanrusttegiin gávdnojit lassedieđut olgomusea historjjás ja dan sierra čuozáhagain. Čuozáhahkan leat ee. Tirro šillju, bealljegoahti ja mielde leat maiddái musea vuosttas geassebargi Matti Morottaja muittašeamit musea álgoáiggiid birra.

Siidda mobiilaoahpistanrusttegat lea davvisámegillii, suomagillii ja eaŋgalsgilii. Ná dat eai bálval dušše báikkálaš olbmuid muhto maiddái Siidda eará galledeaddjiid.

Olgomusea mobiilaoahpistanrusttetfidnu lea ollašuhtton Seainnihis musea -bálvalanrusttega vehkiin, man leaba searválagaid ovddidan Suoma musealihttu ja Momeo Oy. Olgomusebirrasa mobiilaoahpisteapmi lea oassi Musealágádusa fidnoruhtadeami ožžon Olgomusea Dál! -prošeavttas. Siidda ođasmahttinfitnu ulbmilin lea buktit árbevirolaš olgomusea otnábeaivái nu, ahte dat bálvala ođđa vuogi mielde dálá olbmuid. Mobiilaoahpistanrusttegiid leat čohkken Sámemusea prošeaktabargi Tiina-Mari Kärnä ja Sámemusea kulturbirasovttadat.

Siidda kulturbirasovttadat – ságastallandilálašvuohta 19.9.2104

Siidda kulturbirasbeivviid ulbmilin lea lasihit sámeguovllu kulturbirrasii guoskevaš áddejumi ja árvvusatnima ja buktit ovdan Sámemusea kulturbirasovttadaga doaimma kulturbirrasa seailuma, gáhttema ja dasa guoskevaš dieđuid čoaggima dáfus. Kulturbirasovttadat lea doaibman prošeavttaid ja sierraruhtadeami vuođul badjel golbma jagi, ja dan doaimmas leat fidnejuvvon erenoamáš buorit bohtosat. Ovttadaga doaimma bissovažžandahkan lea oktan doaibmabidjun riikkadási kulturstrategiijas. Ovttadaga doaibma lea doarjumin maiddái sámiid kulturiešstivrejumi.

Sámeguovllu kulturbiras lea ollisvuohta, mas luondu ja kultuvra giessaseaba oktii áibbas iežasláhkai ja masa gullá oktan mávssolaš oassin oaidnemeahttun kulturbiras. Sámiin leat valjis duovdagii, guovlluide, báikkiide ja olbmuide guoskevaš báikkálaš árbedieđut ja -dáiddut. Árbedieđuid bokte duovdaga sáhttá áddet, dulkot ja das máhttá doaibmat. Árbedieđut leat mearkkašahtti oassi sámi kulturduovdagis.

Bearjadaga 19.9.2014 lágiduvvo Siidda auditorios ságastallandilálašvuohta kulturbirrasa doaimma bissovažžandahkamis bovdejuvvon gussiide.