Gállok Protest Art – Proteastadáidda Gállokis oaidninláhkai Siiddas 13.6.-21.9.2014

Dáiddárat oassálaste viššalit ruvkedoaimma vuostálasti miellačájáhussii Kamp Gállokis Ruoŧa Johkamohki lahkosiin. Kamp Gállok ceggejuvvui geassit 2013, go ruvkeovttastupmi JIMAB álggahii vuovdečuohppamiid guovllus, gos ruvkke iskkadanbohkamat galge dáhpáhuvvat. Vuovdečuohppamiid dihte vuosttas aktivisttat boahtigohte báikki ala.

Kamp Gállok -leairras šattai riikkaidgaskasaš deaivvadanbáiki, gos ruvkevuostálastit, luonddusuodjaleaddjit ja sámit vuostálaste ovttas plánejuvvon ruvkke. Suoidne- ja borgemánus Kamp Gállokis lágiduvvojedje moanat kulturdoalut, ee. dáiddabargobádji. Das ledje mielde sámedáiddárat, ee. Anders Sunna, Jenni Laiti ja Lena Viltok, sihke leairras orodeaddji aktivisttat. Dávvaliin, plakáhtain ja installašuvnnain čohkiidii okta stuorra dáiddaduodji Gállokis ruvkesadjái manni geainnu ala.

Go Kamp Gállok gurrejuvvui čakčat, de dáiddárkollektiiva rájai plakáhtaid, banderollaid ja istallašuvnnaid ja johttái geaidnogiddenrusttegiiguin čájáhussáliide. Gállok Protest Art lea leamaš juo oaidninláhkai Johkamohkis, Ubmis, Lulejus ja Nikkaluovttas ja dál sáhttá dasa oahpásmuvvat Siiddas. Sámedáiddár Anders Sunna gávnnahii čájáhusa rahpandilálašvuođas Johkamohkis čakčamánus 2013: ”Dát lea okta vuohki dáistalit, dát lea min kreatiivvalaš vuostálastinvuohki.”

Gállok-gámpádallan lea okta mávssoleamos vuoigatvuođadáistalemiin, mii sámiin lea dál jođus. Sámekultuvra ja -dáidda leat ožžon ođđa fámuid, mii oidno bures maiddái Gállok Protest Art -čájáhusas. Sámiid dáiddalaš ja kultuvrralaš vuosteháhku ruvkkiid vuostá joatkašuvvá nanusin. Geassit 2014 Gállokis lágiduvvojit moanat ođđa kulturdoalut.

Gállok Protest Art  -Proteastadáidda Gállokis lea ovdan Siiddas 13.6.2014. Siida lea rabas geassebaji áigge 9.00-20.00.