Áilegasdálus vuot ođđa čájáhus – Sámenuoraid dáiddadáhpáhusa 20 jagi muitut oidnosis

Čájáhusa leat ollašuhttán Siida ovttas Sámenuoraid dáiddadáhpáhusa váldoordnejeddjiin Sámedikki skuvlen- ja oahppamateriáladoaimmahagain. Čájáhussii leat čohkken dáiddadáhpáhusmuittuid badjel 20 jagi áiggis, mielde lea maiddái video Ohcejogas dollojuvvon dáhpáhusas jagis 2015.  Dáiddadáhpáhusat leat goittot ordnejuvvon juo badjel njealljelot jagi, ja jahkásaččat leat máŋggat čeahpes nuorat beassan čájehit dáidduideaset. Dáiddadáhpáhus lea mearkkašahtti sihke nuoraid dáiddadoaimmaid ja sámegielaid olis. Dat lea áinge áidna jahkásaččat ordnejuvvon sámegielat nuoraiddáhpáhus Suomas.

– Sámenuoraid dáiddadáhpáhus oahpisin! – čájáhus heive Ohcejohkii hui bures daninge, ahte jagi 2015 dáiddadáhpáhus ordnejuvvui dáppe, lohká sámemusea Siidda čoakkáldatmeašttir Marjo-Riitta Rantamäki, guhte lea álggu rájes leamašan mielde ollašuhttime čájáhusa.  – Dasa lassin Ohcejogas leat boahtán olu násttit, geaidda dáiddadáhpáhus lea fállan vuosttas lávddi, man alde sii leat rahčan stuorat beakkálmasvuhtii.

Sámemusea Siida ja Davvi-Sámi luondduguovddáš Siida bargaba ovttas Ohcejoga gielddain, ja ovttasbarggu oidnoseamos oassi lea čájáhusaid ordnen Ohcejoga Áilegasdálus. Jagi sisa goalmmát čájáhus ceggejuvvui geassemánu álggus.

Ohcejoga gielda ovddida Áilegasdálu doaimmaid. Váibmosis lea sámekultuvra ja dan oktavuohta birasguovlluide sihke birgenvejolašvuođat sámeguovlluin. Siida lea addán iežas oasi Áilegasdálu máŋggabealat doaibmafálaldahkii, go lea buvttadan čájáhusaid báikkálaš olbmuid ja mátkkošteddjiid illun.

– Čájáhusat Áilegasdállui leat plánejuvvon juo guhkes áigái ovddosguvlui, muitala luondduguovddáš Siidda čájáhusain vástideaddji sierraplánejeaddji Pasi Nivasalo. – Čuovvovažžan mii buktit deike Eatnanšaddu –čájáhusa čakčat.

Eatnanšaddu –čájáhus muitala luonddu šattuin ja daid ávkkástallamis. Čájáhussii čoggojuvvojit ávdnasat juo geasi álggu rájes. Ohcejoga gielda ordne gaskavahku 15.7.2015 dmu 17.00 Áilegasdálus logaldallama ja meahccetuvrra, main muitaluvvo šattuid dovdamis, čoaggimis ja giehtadallamis. Dasa lassin suoidnemánnui leat plánejuvvon earáge šaddotuvrrat.

Sámenuoraid dáiddadáhpáhus oahpisin! – čájáhusa rahpan lea Áilegasdálus duorastaga 11.6. Lassedieđut rahpandilálašvuođas ja dálu doaimmain oažžu Ohcejoga gielddas. Ohcejogas čájáhus dolvojuvvo Turku álbmogiidgaskasaš girjemeassuide 2. – 4.10.2015. Jahkemolsašumi maŋŋá čájáhusa beassá oaidnit Heahtás luondduguovddáš Skierris ja giđđat cuoŋo – miessemánus 2016 fas Soađegili bealde luondduguovddáš Dáŋgeváris.