Kultureahket Siiddas – lea sáhka Outi Korpilähde nákkosgirjjis rivgoeamidiid birra

Iežas nákkosgirjji várás Outi Korpilähde dutkkai suomarivguid ásaiduvvama sámeservodahkii sámedievdduid guoibmin ja bearašlahttun. Dutkamuša várás son jearahalai 33 Suoma sámeguovllus ássi rivgu.

- Sámeservodahkii ásaiduvvan suomarivgut leat viššalis doaibmit, go sii oahpahallet mo galgá láhttet ja doaibmat sámiid gaskkas. Sis šaddet máŋggakulturmáhttit, geat sáhttet doaibmat kulturdulkan látte- ja sámekultuvrra gaskkas, lohká Korpilähde iežas dutkanbohtosiin.

Su doavtterdutkamuša boađusin riegádii girji Kun pohjoisen matkasta tuli elämän mittainen, suomalaisvaimot saamelaisyhteisössä. Outi Korpilähde boahtá Siidii doallat kultureahkeda, mas son muitala iežas nákkosgirjji birra.

- Sullasaš dilálašvuohta lea juo lágiduvvon Ohcejogas, muhto dál lea maiddái anárlaččain vejolašvuohta boahtit gullat mu dutkamušas ja ságastallat fáttás, muitala Outi.

Outi Korpilähde lea ássan guhká Anáris ja doaibman Sámi Oahpahusguovddáža lektorin jagi 1992 rájes.

Go davvimátkkis šattai eallima guhkkosaš -kultureahkedii beassá nuvttá. Dat lágiduvvo gaskavahku  21.10. diibmu 17.30 Siidda auditorios.