Lagabui 11 000 gallededje Siidda čájáhusain suoidnemánus

Geasse- ja suoidnemánu bokte statistihkat čájehit Siidii hohpolaš geasi, ja dakkár dat lea áššehasbálvalusas leamašange.

- Ovtta beaivvi galledeaddjiolahus lei 543 bileahta oastán olbmo, áššehasbálvalusa vástideaddji Minna Väisänen Sámemusea Siiddas muitala. – Ja badjel 450 vuvdojuvvon bileahta beaivvit leat leamaš máŋga dan geasi.

Olgoriikkalaččaid mearri suoidnemánu gallededdjiin lei badjel bealli. Suopmelaš čájáhusguossit Siiddas fidne suoidnemánu áigge 3846, go fas olgoriikkalaččaid mearri bileahta oastán olbmuin lei 6888. Stuorámus joavku olgoriikkalaš gallededdjiin ledje duiskalaččat (1284) čielga erohusain Šveicii (874) ja Polskii (589).

Olles galledeaddjimearrái rehkenastojuvvo čájáhusgussiid lassin maid Meahciráđđehusa vánddardanrávvema ja lobiid vuovdima áššehaččat ja Anára gieldda turismainfo áššehaččat. Suoidnemánu áigge Siiddas leat galledan oktiibuot 24 408 áššehačča. Dat lea sullii 4 000 eanet go ovddit gesiin.

- Turistat leat leamaš erenomážit beroštuvvan Anára lahka johtti ruvttain, Juvdu bálgás ja bálgás, mii manná Bielbbájávrái, Meahciráđđehusa áššehasrávvejeaddji Kirsikka Mansikka-Aho lohká. – Lassin Leammi guovllus leat jearadan máŋgasat, ja mii leat addán vánddardanrávvema álbmotmeahcis ja dan bálvalusain.

Sámemusea ja Davvi-Lappi luondduguovddáš Siidda geassebadji joatkašuvvá alo čakčamánu 19. beaivve rádjái. Dan rádjái Siida ja nuppi gearddis doaibmi restoráŋŋa Sarrit leaba rabas juohke beaivve diibmu 9 – 19. Historjjálaš olgomuseaguovlu lea maiddái rabas geassebajis. Geassebaji maŋŋá Siida lea rabas vu-so 10 – 17.

Molsašuddi čájáhusaid dievasmahttojuvvo A Fighting Spirit – Vuollánmeahttun vuoigŋa olgočájáhusain, mii čoahkkana Suohpanterror joavku beali váldi plakáhtain. Čájáhus lea oidnosis Siiddas 30.9. rádjái.