Luondduguovddáš Siidda ođđaseamos čájáhus láidesta davviguovlluid čáziide

Lappi davimus guovlluid čáhcebirrajohtin ovdanbuktojuvvo čájáhusas fiinna čuovgagovaiguin ja daid dievasmahtti čállosiiguin. Čáhci lea mierkán áimmus, čáhčečalmmiin, jávrriin ja ládduin, jogain ja ádjagaččain. Čáhci viggá goittotge álo meara  guvlui. Doppe čáhci beaivváža liggema dihte hevrriida áibmui ja goas nu fas máhccá eatnama ala arvin – ja nu čáhci joatká iežas agaláš birrajohtima. Davimus Lappi čázit luitet Jiekŋamerrii.

Čájáhusa nubbin temán leat Anár–Ohcejohka-guovllu čáhcevánddardanjohtolagat. Čuovgagovaiguin ja oanehis čilgehusteavsttaiguin geahččit mieđuštuvvojit mátkái dán guovllu dovdoseamos melodančáziide, dego Avviljohkii ja Anárjávrri ala, muhto maiddái dakkár fiinna melodanbáikkiide, mat eai leat vel seamma dovdosat. Hui fiinna govat ee. Deanus, Anárjogas ja Njellimis hohkahit olbmuid oahpásmuvvat dieidda guovlluide juogo kanohtain dahje kajáhkain melodettiin.

Čájáhusa leat ealáskahttimin moanat videot. Orustanbáikkis sáhttá čohkkedastit oahpásmuvvat ealli gova bokte Anárjávrri, Avviljoga ja Lohtu čáhcevánddardanjohtolagaide. Ealli gova lea vel dievasmahttimin 1966:s filbmejuvvon fanasjohtin Anára Sikkávuonas Muttošjávrri, Geaptoveijoga ja Báđára bokte bajás Leammái. Filbma lea fidnejuvvon skeaŋkan priváhtačoakkáldagas.

Dat guhte lea oahpásmuvvan dán čájáhussii, movttáska várra iešge melodeapmái!

Báruid alde ja čáhcegierragiin -čájáhusa lea buvttadan Meahciráđđehusa Lappi luonddubálvalusat.