Maorit lávkejit lávdái jagi 2017 Skábmagovat-festiválas

Maorilávlu-filbmadahkki Moana Maniapoto boahtá ođđajagimánus Anárii, gos Skábmagovat-filbmafestivála váldotemán leat Aotearoa (Ođđa Selándda) maorifilmmat. Čakčamánus iežas ruovtturiikkas musihka Hall of Famei válljejuvvon Maniapoto doallá konseartta kulturguovddáš Sajosis lávvardaga 28. ođđajagimánus 2017.

Maorifilmmas lea dál nana áigodat. Varraseamos ovdamearka das lea Taika Waititi, guhte nuppi maoribagadalli Lee Tamahoria (Once we were warriors) lassin, lea beassan dahkat filmmaid Hollywood-ruhtademiin. Máŋggabealat maoriprográmma olis Skábmagovat čájeha muhtun Waititi filmmaid, main guokte (Boy ja Hunt for the Wilderpeople) leat loktanan Ođđa Selándda historjjá eanemus gehččojuvvon filbman.

Sámi ávvu

Iežas lasáhusa prográmmii buktá sámiid ávvojahki. Sámi álbmotbeaivi deavdá čuođi jagi guovvamánus ja sámi filbma ges 30 jagi.

Álbmotbeaivvi ávvudeapmái ráhkkanit máilmmi premiearain dokumentárafilmmain Elsa Laula Renberga birra. Renberg, lullisápmelaš aktivista ja politihkkár, lei guovddážis boktaleamen sámiid oktiigullevašvuođa dovddu 1900-logu álggus. Filmma lea bagadallan Roger Manndal.

Sámi filmma jorba jagiid ávvudit ovttas maoriiguin čájáhusas, mas guokte Oscar-evttohassan leamaš álgoálbmotfilmma deaivvadit: Nils Gaup dáhpáhusrikkis Ofelaš (1987) ja Taika Waititi fiinna oanehisfilbma Two Cars, One Night (2004).

Katja Gauriloff bures menestuvvan dokumentárafilbma Mannu mieʹcc Kaiʹssi (Mánu meahci Kaisa) čájáhusa oktavuođas oažžut ee. gullat muittašemiid girječálli Robert Crottetis ja dan lassin Arkiivva árdna oasis čájehit nuortalašfilmmaid Jarmo Laine Yleisradio-materiálas, man su árbbolaččat skeŋkejedje dán čavčča Sámi arkiivii.

Vuosttaš háve Skábmagovat fállá maid dánsundáidaga muohtateáhteris. Jotteeh-čájáhusa lea plánen Suoma Našunálabaleahtas ja Tero Saarinen Companys jagiid dánson, Anárii diibmá jagi fárren anáraš Auri Ahola.

Vuorus lea 19. Skábmagovat-festivála, mii lágiduvvo Anáris 26.–29.1.2017. Filmmat čájehuvvojit sámekulturguovddáš Sajosis, Sámemusea ja luondduguovddáš Siiddas ja muohttagis huksejuvvon Guovssahasteáhteris. Prográmma almmustuvvo juovlamánus čujuhusas www.skabmagovat.fi.

Festivála lea oassi Suopma 100 –ávvojagi prográmma.

Lassidieđut:

Jorma Lehtola, dáiddalaš jođiheaddji, tlf. 050 4144349

Anne Kirste Aikio, festivála jođiheaddji, tlf. 040 7681689

Sunna Nousuniemi, buvttadeaddji tlf. 040 9666318.

Festivála lágida Sámi Dáidaga doarjjasearvi rs. ovttasbarggus Sámemusea ja luondduguovddáš Siiddain, kulturguovddáš Sajosiin, Eamiálbmogiid filbmaguovddáš Skápmain, Sámi oahpahusguovddážiin, Internašunála Sámi Filbmainstituhtain ja YLE Sámiin.

Festivála suodjaleaddjin doaibmá rovvá Jenni Haukio.