Navajot ja Burma álbmogat Skábmagovaid čuovggas

Skábmagovat fállá maid pionerabargguid, nu movt vuosttaš álgoálbmotgillii dahkkon filmma Bangladeshas (Aung Rakhine Sihkkalan) ja vuosttaš ainuid muitalusa vuođul ráhkaduvvon animašuvnna (Tune Sugihara Shichigorosawan kettu). Áibbas áidnalunddot lea krimatatáragielat guhkesfilbma, Ahtem Seytablaevin Haytarma, mii muitala Krima tatáraálbmoga bággosirdmiin Gaska-Ásiai giđđat 1944. Kanadas fállet ee. guokte earenoamáš, Lars von Trieris movtta ožžon Embargo-filbmaráiddu. Dain álgoálbmotbagadalliid joavku šattai dahkat filbmaset nuppiid eavttuid mielde. Šáŋŋerat leat komediijas soaiggusfilbmii ja minimusikálii.

Sámefilbma Sundances ja jávohisvuohta

Suvi West ođđa 70-minuhta dokumentárafilbma Spárrooabbán lea persovnnalaš filbma su oappás, guhte lea válljen geainnu, mii lea konservatiivvalaš sámeservodagas tabu: ráhkisvuohta nuppi nissonii. Vástádusaid ja dohkkeheami ohcalettiin soai deaivvadeaba jávohisvuođa bávttiin. Prográmmas lea maid Amanda Kernell oanehisfilbma Stoerre vaerie, vuosttaš sámi filbma, mii lea válljejuvvon beakkán Sundance-festivála prográmmii USA:s. Golggotmánus filbma vuittii oanehisfilmmaid gilvvu ImagineNative-festiválas Kanada Torontos.

Sámi teáhter addá leavttu rahpaneahkedii

Festivála rahpandoalut lea Mánáidfestivála maŋŋel duorastateahkes 21.1. festivála dovddus Guovssahasteáhteris. Rahpandoaluid maŋŋel Giron Sámi teahter čájeha kulturguovddáš Sajosis ođđa čájálmasas Reáktor. Dat govvida, movt Suoma čihččet atomfápmorusttet Anáris bávkkeha ja bidjá das ceavzán olbmuid suokkardallat stuorra gažaldagaid. Kenneth Hætta lea čállán čájálmasa ja dan lea bagadallan Anita Suikkari ja dat tekstejuvvo suomagillii.

Festivála lágidit Sámi Dáidaga doarjjasearvi rs. ovttas Sámemusea ja luondduguovddáš Siiddain, kulturguovddáš Sajosiin, Eamiálbmogiid filbmaguovddáš Skábmain, Sámi oahpahusguovddážiin ja YLE Sámiin. Festivála suodjaleaddjin doaibmá rovvá Jenni Haukio.

Olles prográmma ja preassagovat gávdnojit neahttasiiddus skabmagovat.fi

Lassidieđut:
Jorma Lehtola, tel. +358 50 414 4349, jorma.lehtola(a)skabmagovat.fi
Anne Kirste Aikio, Festivála jođiheaddji, tel. +358 40 768 1689, anne.aikio@skabmagovat.fi

Ruhtadeaddjin leat Sámeráđđi, Suoma Sámediggi, Lapin rahasto, Anár gielda, Oahpahus- ja kulturministeriija, Suoma kulturruhtarádju, Kone-foanda, Antti ja Jenny Wihuri foanda ja Taike – Dáidaga ovddidanguovddáš.