Ođđa sámi filmmat geasuhedje Skábmagovat-festivás

Festivála temá dagai vejolažžan fállát eamiálbmotfilbmamáilmmi girjáivuođa ja mapuchebagadalli gitta Chiles. Jeannette Paillán buvttii festiválii guokte su bagadallan dokumentárafilmma, guovddáš temán dain ledje sisabahkkemat ja eamiálbmogiid eatnamiid luondduriggodagaid ávkkástallan. Festiávalas eanemus rámi ja vejolaččat guhkimus gieđaid speažžumiid dinii jakuhttabagadalli Mihail Lukatševski fikšuvdnafilbma Urun Kun (Vilges beaivi), mii lei buvttaduvvon unna binná 7000 euro bušeahtain.

Festiválas fálaimet maid sámi premiearaid musihkkafilmmaid hámis, go Ima Aikio golbma ođđa musihkkavideo bohte vuosttaščájáhussii. Musihkkavideoin lávlu ja UMK-gilvvohalli Hilda Länsman rabaige luđiin festivála duorastaga. Rahpandoalut čohkkejedje vuordemeahttun ollu olbmuid Guovssahateáhterii buollašis beroškeahttá. Rahpandoaluin čájehuvvui maid vuohččan animáhtor Jouni West festiválii dahkan dovdofilmmaš. Rahpama oktavuođas bođii maid ovdan sámi filmma dáfus dehálaš ođas: sámi filbma lea váldotemá  boahttejagi ImagiNATIVE-festiválas Kanadas boahtte čavčča.

Nu movt vurddiimetge Sámi Film Lab:as  Guovdageainnus buvttaduvvon ođđa sámi filmmat ožžot olbmuid čoahkkanit, Sajosa auditoriija dievihiige guktii gehččiin daid filmmaid oktavuođas. Gehččiid maid ilosmahtii, go Suoma Big Brother vuoiti Andte Gaup-Juuso bođii báikki ala. Son neaktá váldorolla Sámi bojá filmmas. Eará sámi filmmat, mat čohkkejedje moaddečuođi geahčči guhtege, ledje Davvi-Norgga mielkeruvttu birra muitaleaddji Frode Grønmo Melkeveien ja gehččiid váimmuid liggii earenoamážit Harry Johansena Ivnnit ja eallin sihke Silja Somby Bonki.

Eahketdoaluin gehččiid beroštahtii Maxida Märak, guhte lei vuosttáš háve lávddi alde Suoma bealde.

Festivála čohkkii dan jagi gehččiid oktiibuot 2800, eahketdoaluin fitne 490 olbmo. Mánát ja nuorat ledje sulaid 250-300, filbma ja bargobadje galledeamit čoggojedje oktiibuot 550. Geahččilogut ledjet seammasullasaččat go diibmá. Sajosa lassin filmmat čájehuvvojedje Siidda auditorias ja festivála dovdomearkkas, muohttagis huksejuvvon Guovssahasteáhteris. Filmmat ledje eambbo go goassige ovdal, oktiibuot 80.

Skábmagovat-festivála lágida  Sámedáidaga doarjjasearvi rs, ovttasráđiid  Sámemusea ja luondduguovddáš Siiddain, kulturguovddáš Sajosiin, Eamiálbmogiid filbmaguovddáš Skábmain, Sámi oahpahusguovddážiin ja YLE Sápmiin.
Ruhtadeaddjin leat Sámeráđđi, Suoma Sámediggi, Lappi kulturdoaibmagotti, Anár gielda, Oahpahus- ja kulturministeriija, Suoma kulturruhtarádju, Lappi ruhtarádju, AVEK – audiovisualálaš kultuvrra ovddidanguovddáš, TAIKE – Dáidaga ovddidanguovddáš.

Festivála suodjaleaddjin doaibmá rovvá Jenni Haukio.

Lasi dieđuid oažžu:

Jorma Lehtola, dáiddalaš jođiheaddji, tlf. 00358 50 414 4349.

Anne Kirste Aikio,  festivála jođiheaddji tlf. 00358 40-7681689.