Pedar Jalvi –muitočájáhus rahpojuvvo Siiddas 12.4.

Čájáhus gudnejahttá Jalvvi eallinbarggu ja das leat olu arkiivamateriálat, mat ovdal eai leat leamašan oidnosis. Dat leat čohkkejuvvon ee. Jyväskylän eanangotti arkiivvas, Gaska-Suoma museas ja Suoma Girjjálašvuođa Searvvis (SKS). Pedar Jalvvi jápmimis leat dán jagi gollan 100 jagi.

Professor Vuokko Hirvonen muitala logaldallamis, mo 1800-logu loahpas riegádan ohcejohkalaš Piera Helanderis, Lemehaš Biehtáris, šattai sámegielat girječálli Pedar Jalvi. Logaldallamis čuovvut Pedar Jalvvi luottaid su mánnávuođaruovttus Badje-Jalvvis vuos Savvona skuvlii, luohtečoagginmátkái Guovdageidnui ja gitta Jyväskylä oahpaheaddjiseminára rádjái. Studerenáigge (1911–1915) Jalvi čokkii sámi njálmmálaš árbevieruid ja duon áigge riegádedje maiddái máŋggat aviisačállosat ja Muohtačalmmit-girji. Jalvvi oanehis eallin nogai čuohte jagi dassái (1916) Anára girkosiidii, gosa son lea hávdáduvvon. Vaikke vel Jalvvi girjjálaš karrieara báziige oanehažžan, de su bargguin leamašan dehálaš váikkuhus sámi girjjálašvuhtii.

Pedar Jalvi –muitočájáhusa rahpandoaluid ávvuduvvo máŋŋebárgga 13.4. Siidda auditorias diibmu 13. Dilalašvuohta lea rabas buohkaide. Sámi girjjálašvuođa ja skuvladutkama professor Vuokko Hirvonen logaldallama máŋŋel sáhtta oahpasmuvvat Pedar Jalvi –muitočájáhussii.

Čájáhus johtá dán jagi, ja dat lea oaidninláhkai Siiddas 12.4.-29.5.2016.