Siida skeŋke Anára ja Ohcejoga gielddain 2015:s riegádan unnoraččaide ja sin bearrašiidda nuvttá sisabeassama Siidda čájáhusaide

Skeaŋkagoarttain unnamánnábearraša lahtut besset ovttas oahpásmuvvat Siidda čájáhusaide. Skeaŋkagoarta lea fámus máná riegádeami rájes ja dainna beassá oktii nuvttá Siidda čájáhusaide. Ná Siida háliida sávvat unnamánnábearrašiid oahpásmuvvat iežaset ruovttuguovllu historjái, sámekultuvrii ja lundui.

”Mii háliidat muitit iežamet ruovttugieldda mánnábearrašiid ja sávvat sidjiide buresboahtima Siidii”, dadjá museahoavdda sadjásaš Sari Valkonen. Bearrašiid unnoraččat besset ná juo unnivuođa rájes oahpásmuvvat kultuvrii ja lundui. Beaiveruoktoahkásaš mánát fitnet beaiveruovttuid geahču vuolde dás duohkoge Siiddas. Skuvlamánáide Sámemusea ja Davvi-Sámi luondduguovddáš Siida lágida máŋggalágan prográmma, bargobájiid ja vásuid searválagaid skuvllaiguin. Anára gieldda skuvlamánát besset nuvttá Siidii. Maiddái MLL:ain mis lea ovttasbargosoahpamuš.

Siiddas gávdnojit valjis dakkár diŋggat, maid mánát ja nuorat sáhttet geahčadit ja imaštallat. Čájáhusat leat maiddái daid min unnimusaid čalmmiid allodagas. Siidda váldočájáhusas sáhttá imaštallat, mo guovža oađaša dálvenahkáriid ja dalle oaidná seammás, man unnit dat guovžžačivggat duohtavuođas leatge. Sii besset maiddái oahpásmuvvat nuvttohiid goarrumii ja gámasuinniid ávnnasteapmái. Siidda máŋggabealat fálaldagat geasuhit maiddái rávesolbmuid.

”Siida ii leat dušše mátkkálaččaid várás. Sávvat ahte Anára ja Ohcejoga gieldalaččain nu máŋggas go vejolaš guovlladit Siiddas. Molsašuvvi ja máŋggabealat čájáhusat sihkkarastet dan ahte Siiddas gávdno álo juoga, maid gánneha fitnat oaidnimin ja vásiheamen”, dadjaba Sari Valkonen ja Luondduguovddáža dikšu Kirsi Ukkonen Siiddas.