SIIDDAS FITNE 2014:s LAGABUI 100 000 OLBMO
Maŋŋebárga 13. Ođđajagemánnuta 2015, 16.55Galledeaddjirehkenasti mielde Sámemusea ja luondduguovddáš Siiddas fitne oktiibuot 98 470 olbmo 2014:s. Galledeaddjistatistihkkema mielde dáin olbmuin 47 081:s ledje čájáhus- ja dáhpáhusáššehasat, ja dáid lassin Siiddas fitne olbmot earret eará Restoráŋŋa Sarritis sihke Meahciráđđehusa áššehasbálvalusas ja Anára gieldda turismainfos.
Njoammelguoikka šaldi. Govva: Pasi Nivasalo
Siidda galledeaddjiin Suoma olbmot ledje 45 % ja olgoriikalaččat 55%. Olgoriikalaččaid ossodat lea lassánan diimmážis. Olgoriikalaččain stuorámus joavkun ledje fránskalaččat (3792) ja dakka maŋŋá bohtege duiskalaččat (3788). Eará mearkkašahtti riikkavulošjoavkun ledje šveicalaččat (1781), itálialaččat (1728), davviamerihkkálaččat (1634) ja hollándalaččat (1583).
Riikkavulošstatistihkkii fidnejuvvojedje olles 74 sierra ruovtturiikka/riikkavulošvuođa. Mealgat olbmot bohte maiddái earret eará Estteeatnamis (166), Ungáris (107) ja Slovenias (72). Ásias bohte mátkkálaččat ovdamearkka dihte Singapores (85) ja Israelis (69). Earret Ovttastuvvan Stáhtaid ja Kanada eará sajis Amerihkás bohte galledeaddjit Brasilias (91) ja Oseánias fas bohte eanemus galledeaddjit Ođđa-Selánddas (68). Afrihká riikkain eanemus galledeaddjit bohte Lulli-Afrihkás (36). Dán galledeaddjistatistihkas gávdnojit maiddái dákkár midjiide viehka vuordemeahttun riikkat dego Arábaemirihtat, Mongolia, Filippiinnat, Argentina, Peru, Uganda ja Zimbabwe – 1-6 galledeaddji/riika.
Eanemus Siiddas fitne olbmot suoidnemánus. Dalle galledeaddjit ledje 9317. Ođđejage-, cuoŋo-, miesse-, geasse- ja juovlamánus fitne eanet olbmot Siiddas go ovddit jage. Erenoamážit Siiddas illudit das, ahte skábma- ja juovlamánu galledeaddjimearri lea lassánan. Lassáneapmi dáid skábmamánuid hárrái lea dáhpáhuvvan maŋimuš njealji jagi áigge. 2010:s skábmamánus ledje galledeaddjit 177, ja 2013:s ja 2014:s badjel 2200. Juovlamánus 2010:s fas ledje galledeaddjit 1080 ja 2014:s lagabui 3000.
Meahciráđđehusa dagahan vánddardančuozáhagaid lohkančuovvumiid vuođul leat fidnejuvvon movttiidahtti bohtosat 2014:s.
Meahciráđđehus ja Anára gielda leaba ovttas ordnen Juvddu bálgá. Ja doppe lea Njoammelguoikka (Njuámmilcooskâs) šaldi, man leat dássážii rasttildan 10 232 olbmo. Olbmot leat johtán valjis doppe maiddái dálvvi áigge, omd. juovlamánus 395 olbmo. Bielbajávrri meahccegirku birra fidnejuvvui dál vuosttas birrajagáš gokčevaš galledeaddjilohkan, man mielde 2014:s boares meahccegirku fitne hervvošeamen 6445 olbmo.
Leammi álbmotmeahcis ja Geavu luonddumeahcis galledeaddjimearit bisso sullii ovddeš dásis: Leammis fitne 12160 olbmo ja Geavus 4323 olbmo. Suttesádjaga luonddubálggis orru geasuheamen, dán gease galledeaddjimearri lei lassánan logiin ovddit geasis (2014: 2650).
Meahcceráđđehusa luondduguovddáš, Siida, Inarintie 46, FI-99870 Anár, tel. +358 (0)206 39 7740, siida@metsa.fi, www.siida.fi, www.luontoon.fi
Oahppobálgát–čájáhus ovdanbuktá Sámi oahpahusguovddáža skuvlenfálaldaga
Anára márkana juovllaid rahpandoalut duorastaga 1.12.2016
turismainfo
Sámemusea blogga
