Siiddas fitne jagi 2015 badjel 113 000 guossi – váikkuhus báikkálaš ekonomiijai Anáris lei 2,63 miljon euro

Musealihtu dahkan dutkamuša mielde juohkehaš museaguossi golaha museagalledallama oktavuođas gaskamearálaččat 49,40 € sajádatguovllus. Jagi 2015 guossemeari mielde Siidda čájáhus- ja dáhpáhusguossit leat buvttadan Anárii oktiibuot 2,63 miljon euro.

Sámemusea ja Davvi-Sámi luondduguovddáš Siidda váldouvssa rehkenastinrusttet leat coahkkán dávjjet, go jagi 2015 áigge dálus galledalle oktiibuot 113 474 guossi. Logus leat mielde čájáhus- ja dáhpáhusguossit ja maiddái Davvi-Sámi luondduguovddáža vánddardanrávvema áššehasat, Anára gieldda turismarávvema áššehasat, sihke restoráŋŋa Sarriha ja Siidda Shoppi áššehasat.

Earenoamáš guossemearrái leat váikkuhan Anára lassánan dálveturisma, muhto maiddái Siidda alladási molsašuddi čájáhusat ja bissovaš čájáhusat. Siidda máŋggabealat bálvalusfálaldat geasuha nu ruovttueatnama go olgoriikkaidge gussiid. Go guossemearit leat lassáneamen de Siidda plánejuvvon viiddideapmái lea dárbu. Siidda guosse- ja čoakkáldatsajit leat dál menddo gáržžit ja vuođđočájáhusaid sisdoalu ja ovdanbuktinvuogi lea dárbu ođasmahttit. Plánenbargu lea jođus ja dál ohcat investerenruhtadeami.

Čájáhus- ja dáhpáhusgussiid badjel 53 000 guossemearri lea ovddit háve leamašan jagi 2007. Čájáhusgussiid mearri 53 232 lea čielgasit buoret go ovddit čieža jagi áigge, goas čájáhusgussiid mearri leamašan vuollel 50 000. Jagis 2014 čájáhusguossemearri lea lassánan 13%.

Čájáhusgussiin olgoriikalaččaid oassi lea lassánan ovddit jagis. Gussiin olgoriikalaččat ledje 57 % ja ruovttueatnanlaččat 43 %. Olgoriikalaččain stuorámus joavkun ledje duiskalaččat (4551) ja frankriikalaččat (4495). Goalmmádin eanemus ledje kiinnálaččat/hongkoŋŋalaččat (2228), geaid guossemearri stuorui 81 % ovddit jagi ektui. Buohkanassii Siiddas leat jagi 2015 galledan olbmot 83 eará riikkas. Siida leage hui dehálaš riikkaidgaskasaš čájáhusbáiki Lappi turismmas.

Geassemánotbajit leat Siiddas ain čielgasit ealaskabbo go dálvemánotbajit. Suoidnemánus ledje 10 734 čájáhusguossi. Jagi 2015 juovlamánnu lea registrerejuvvon goittotge Siidda historjjá ealaskamos juovlamánnun, oktiibuot 3464 gussiin. Ovddit juovlamánu olahus lei jagi 2014, goas čájáhusain fitne oktiibuot 2640 guossi.

Lassidieđut:

Sámemusea Siida, tel. 0400 898 212, siida(a)samimuseum.fi

Luondduguovddáš Siida, tel. 0206 39 7740, siida(a)metsa.fi