Siiddas rahpasa 6.2.2015 Sámenuoraid dáiddadáhpáhus oahpisin! -čájáhus

Sámenuoraid dáiddadáhpáhus lea leamaš nuoraid loaiddastanbáikin juo njealljelot jagi. Dáhpáhus nanne nuoraid kultur- ja dáiddabuđaldemiid ja sámegiela geavaheami, oktiigullevašvuođa ja sámi identitehta. Čájáhus čalmmustahttá govaiguin, filmmaiguin ja nuoraid dáiddadujiiguin dáiddadáhpáhusa viiddis mearkkašumi ealli oassin sámekultuvrras.

Dáiddadáhpáhusat leat ilolaš ja ivdnás dilálašvuođat, maidda skuvllain leat ráhkkanan olles jagi. Oahpaheaddjit dorjot dáhpáhusa ja bagadallet viššalit nuoraid. Dáhpáhus fállá nuoraide dilálašvuođa ovddidit dáidduideaset, čájehit daid earáide ja oažžut movttiidahtti máhcahaga duopmáriin sihke stuorra joavkkus báikkálaš ja eará guovlluin boahtán gehččiin. Dáiddadáhpáhussii bovdejuvvojit buot Sámi mánát ja nuorat sihke buot sámegiela ja sámegielat oahpahusas leahkki mánát ja nuorat.

Sámenuoraid dáiddadáhpáhusaid leat ordnen 1970-logu gaskamutto rájes. Dáiddadáhpáhus gulai álggos eará guovlodáhpáhusaiguin riikkaviidosaš Nuoraid dáiddadáhpáhusaid ráidui. Dál dat lea oassi Nuorra Kultuvra –fierpmádagas seamma dásis go eará guovlodáhpáhusat, main válljejuvvojit ovddasteaddjit giđa váldodáhpáhussii dahje dihto jagiid dollojuvvon Skuvllaid Stuorrafestii.

Váldotemá mearriduvvo riikka dáhpáhusa dánsa-, musihkka- dahje teáhtertemá mielde, man lassin prográmmas lea álo juoga erenoamážit sámekultuvrii čatnašuvvi temá. Sámenuoraid dáiddadáhpáhusa ulbmilin ii goittot leat dušše árbevirolaš dujiid ja doaimmaid gáhtten, danin buotlágan dáiddasuorggit leat mielde vurrolagaid. Sámetemán leat leamaš ee. govvadáidda, diktagilvu, joavkočuojaheapmi, ráidogovva, oanehisfilmmat, rollabiktasat, gákte- ja duddjončájáhusat, juoigan- ja musihkkabargobájit.

Dáiddadáhpáhusa váldoordnejeaddji lea sámedikki skuvlen- ja oahppamateriálalávdegoddi, ja ordnemiid koordinere skuvlen- ja oahppamateriáladoaimmahat. Ordnemii oassálastet maid sámiid ruovttuguovllu gielddat. Sámenuoraid dáiddadáhpáhus gullá skuvlajagi bargoprográmmii ja dáhpáhusat dollojuvvojit skuvlavahku áigge. Sámenuoraid dáiddadáhpáhusa ja riikkaviidosaš dáhpáhusaide oassálastima ruhtada Oahpahus- ja kulturministeriija.

Lisätietoja: Marjo Riitta Rantamäki, marjo-riitta.rantamaki@samimuseum.fi, 040 571 5670
Anni Näkkäläjärvi, anni.nakkalajarvi@samediggi.fi, 040 511 1821