Skábmagovat festiválai guossit máilmmis

Festivála váldotemán lea Latiinnalaš Amerihká eamiálbmogiid filmmat. Váldoguossi Jeannette Paillán, mapuchebagadalli Chiles, lea okta eamiálbmogiid filmmaid gárgeheaddji CLACPI vuođđudeaddjilahtuin. Son jođiha maid Mátta-Amerihká stuorámus eamiálbmogiid filbmafestivála.

Cindy Benitez, Smithsonian-instituhta filbma- ja videospesialista New Yorkas, lea nannosit fárus Davvi-Amerihká indiánaid filbmadoaimmain ja nuoraidprošeavttain Gaska-Amerihkás. Instituhtta ásahii jagis 1979 filbma- ja videoguovddáža, mii lea USA boarráseamos eamiálbmogiid mediadáiddaguovddáš.

Jakutialaš bagadalli Mihail Lukatševski Saha dásseválddis Ruoššas lea nuorra buolvva bagadalli, guhte lea gazzan oahpus St. Petersburga filbma- ja tv-universitehtas. Bagadalli lea vuoitán oanehisfilmmaidisguin bálkkašumiid, Anáris ges beassat oaidnit su guhkes fikšuvdnafilmma Urun Kun (Vilges beaivi).

Nubbi Saha guossi, Sardana Savvina, boahtá Arktalaš kultuvrra ja dáidaga stáhtalaš instituhtas (ASIAC), mii lea juo máŋggaid jagiid dahkan ovttasbarggu Sámi oahpahusguovddažiin. Savvina lea maiddái Jakutia riikkaidgaskasaš filbmafestivála kuráhtor.

Duorastaga ovdal virggálaš rahpama, beassat oaidnit dearvvuođaid Tanzanias. Dilálašvuođas oaidnit oanehisfilmmaid Masai-álbmoga vuoigatvuođain. Dili birra eambbo lea muitaleame Jenni Kauppila Suoma ON-lihtus. Oanehisfilmmaid geahččojuvvo Siidda auditorias diibmu 16 rájes.

Lunddolaččat Anárii bohtet maid sámi filbmadahkkit. Báikki alde leat ee. Harry Johansen, Ima Aikio, animáhtorčeahppi Jouni West sihke olles joavku bagadallit Guovdageainnu Sámi Film Lab -prošeavttas, mas čájehuvvojit čieža filmma ollisvuohta.

Diehttelasat mielde lea maid Suoma BB-vuoiti Andte Gaup-Juuso, guhte neaktá váldorolla Elle Sofe Henriksena oanehisfilmmas Sámi boja!

Klubbamusihka fállet Gálloka ruvkevuostálastimiin oahpisin šaddan Maxida Märak ja rápparguovttos Amoc ja Ailu Valle.

Skábmagovat filbmafestivála olles bearrašii heivvolaš rahpandilálašvuohta lea  22.1.2015 dmu 18.00 Guovssahasteáhteris.

Skábmagovat-festivála lágida  Sámedáidaga doarjjasearvi rs, ovttasráđiid  Sámemusea ja luondduguovddáš Siiddain, kulturguovddáš Sajosiin, Eamiálbmogiid filbmaguovddáš Skábmain, Sámi oahpahusguovddážiin ja YLE Sápmiin.
Ruhtadeaddjin leat Sámeráđđi, Suoma Sámediggi, Lappi kulturdoaibmagotti, Anár gielda, Oahpahus- ja kulturministeriija, Suoma kulturruhtarádju, Lappi ruhtarádju, AVEK – audiovisualálaš kultuvrra ovddidanguovddáš, TAIKE – Dáidaga ovddidanguovddáš.

Festivála suodjaleaddjin doaibmá rovvá Jenni Haukio.

Lassidieđut:

Anne Kirste Aikio, tlf. 040 7681 689.

Jorma Lehtola, tlf. 050 4144 349.

www.skabmagovat.fi