Sámedávvirat 3D-hápmosiin

Sámemusea ja Magnani ovttasbargu lea álgán jo jagis 2015, go Magnani bođii čájehit 3D-hápmenvuogi Sámemuseai. 3D-hápmemiin čoakkáldagaid sáhtit ovdanbuktit ain máŋggabealat vugiin. Čoakkáldatdávviriid 3D-hápmosiid lea vejolaš čájehit ja atnit ávkin sihke čájáhusain, neahttačájáhusain ja dutkamušas. Boares ja rašes dávviriid dutkan digitálalaččat, nu ahte dávvirii ii álo dárbbaš guoskat, ovddida dávviriid seailuma.

3D-hápmemiin sáhtit máhcahit dieđu máilmmi museaid sámedávvirčoakkáldagain digitálalaččat servošii. Geavatlaččat dát dárkkuha dan, ahte olgoriikkaid museaid sámedávviriid 3D-hápmet ja digitálalaš dávvirhápmosat vurkejuvvojit Sámemusea diehtovuđđui. Ná oahpásmuvvan sámedávviriidda livččii vejolaš Interneahta bokte gos beare.

Dilálašvuođas 19.1. dmu 17 Matthew Magnani ja Sámemusea amanueansa Anni Guttorm muitaleaba guovtti earálágan 3D-hápmenvuogis ja čájeheaba 3D-hápmosiid Sámemusea dávviriin. Dilálašvuođas ságastallat maid das, makkár dávviriid servoš háliidivččii oaidnit 3D-hápmosiin. Mii sávvat buohkaid bures boahtin dilálašvuhtii.

Lassedieđut: Sámemusea Siida, Anni Guttorm, tel. 0400 891 860, anni.guttorm@samimuseum.fi