Sámedávvirčoakkáldat Hämeenlinnas Sámemusea Siidii

Hämeenlinna gávpotmusea čoakkáldagaide dávvirat leat boahtán hämeenlinnalaš virgeolbmuid ja priváhtaolbmuid skeŋkejumiid bokte dan maŋŋá go musea vuođđuduvvui 1910. Čoakkáldagas leat sihke tekstiillat ja dákte- ja čoarveduojit, main boarrásepmosat leat 1800-logu álggus. Dávviriin lea earret eará ládjogahpira muoras ráhkaduvvon fierra Anára Bárttehis. Čoakkáldagas leat maid dávvirat, mat leat čoggojuvvon Ohcejogas ja Soađegili Riesto-gilis.

Sámemusea Siida lea okta Suoma 16 riikkadási spesiálamuseas ja Suoma sámiid álbmotmusea, man našuvnnalaš ovddasvástádussan lea vurket Suoma sámiid ávnnaslaš ja ávnnasmeahttun kulturárbbi. Suoma museaid vurken- ja čoakkáldatovttasbargofierpmádat TAKO doaibmavugiid mielde museat sáhttet sirdit čoakkáldagaid museaide, mat ovddasvástidit máinnašuvvon čoakkáldagaid vurkemis. Ovdamearkan dán vurkenovttasbarggus Museaguovddáš Vapriikki skeŋkii iežas sámedávvirčoakkáldaga Sámemuseai giđđat 2015. Hämeenlinna gávpotmusea joatká fiidnát dán vurkenovttasbarggu iežas sámečoakkáldatmáhcahemiin. Sámemusea Siida ja Hämeenlinna gávpotmusea leaba jo ovdalis bargan ovttas go Hämeenlinna sámedávvirčoakkáldagas okta gahpir lei Sámemusea Ládjogahpir ja šaamšiǩ -čájáhusas 2013.

Hämeenlinna gávpotmusea sámečoakkáldaga máhcaheapmi lea mearkkašahtti sámi servošii ja Sámemusea Siidii. Sámiid ávnnaslaš kulturárbi lea ain máŋggain museain Sámi olggobealde. Sámedávviriidda gullevaš diehtu ja dáidu lea Sámi servošis, man Sámemusea čoakkáldatbargu buot ovddimužžan bálvala. Máhcahemiid bokte Sámi searvvuš beassá oaidnit, dutkat ja ávkkástallat Sápmái máhcahuvvon dávviriid.

Jagis 2017 lea gollán 100 jagi das Suopma šattai iehčanassan ja vuosttas davviriikkalaš sámečoahkkin lágiduvvui Troandimis. Ávvujagi gudnin Sámemusea Siida ovdanbuktá Hämeenlinna ja Tampere sámedávvirčoakkáldagaid museaid, arkiivvaid ja girjerájuid oktasaš Finna-ohcanbálvalusas. Ná sámit besset ain buorebut geahčadit Sápmái máhcahuvvon sámedávviriid.

Lassedieđut:

Sámemusea Siida, museahoavda Sari Valkonen, 040 767 1052, sari.valkonen@samimuseum.fi

Sámemusea Siida, amanuensa Anni Guttorm, 0400 891 860, anni.guttorm@samimuseum.fi

Hämeenlinna gávpotmusea, museahoavda Tuulia Tuomi, 03 621 2840, tuulia.tuomi@hameenlinna.fi