Sámemusea doaivu ahte gielda smiehtasta ođđasit doaibmadoarjaga heaittihanárvalusa

Sámemusea Siida lea geavahan Anára gieldda jahkásaš 50 000 euro doaibmadoarjaga iežas doaimmaid ovddideapmái. Gieldda doaibmadoarjja lea maiddái dahkan vejolažžan dan, ahte Anára gieldda skuvlamánát leat beassan nuvttá museai. Anára gielddaráđđehusa árvalusa dagahan buot bealit eai leat vel guorahallon musea beaivválaš jođihanvuogádagas dahje musea bajásdoalli Sámi Museum – Saamelaismuseosäätiö stivrras. Museahoavda Tarmo Jomppanena mielas doaibmagáržžideamit čuhcet goittotge doaimma daidda surggiide, maid dikšumii Musealáhka ii geatnegahte musea. Álgočoavddusin ruhtadeami vejolaš geahppáneapmái lea jurddašuvvon ee. guovlludoaimma heaittiheapmi ja dat, ahte jagi 2015 álggu rájes Siida livččii dálvebaji áigge gitta maiddái sotnabeaivve iige dušše vuossárgga.

Sámiid álbmotmusea Siida lea Suoma davimus sierramusea, mii jođihuvvo ámmátlaš vuogi mielde. Sámemusea vuođđodoaibman lea vurket, seailluhit ja čalmmustahttit Suoma sámiid vuoiŋŋalaš ja ávnnaslaš kulturárbbi. Anára gielda lea Suoma sámekultuvrra guovddáš, ja ná Sámemusea mearkkaša ollu maiddái gieldda kulturbálvalusaide; Sámemusea Siida fállá Anáris dakkár kultuvrralaš vuođđobálvalusaid, maid dikšun gullá dávjá gielddaide ja gávpogiidda. Sámemusea lea maiddái leamaš vuođđudeamen ja lágideamen guovllu dovdoseamos kulturdoaluid Skábmagovat-filbmafestivála ja  Ijahis idja -musihkkadoaluid. Sámemusea Siida mearkkaša ollu máŋggakultuvrralašvuhtii láidesteaddjin ja vuoiŋŋalaš buorredili buvttadeaddjin.

Sámemusea-luondduguovddáš Siida lea Anár-Suoločielgi -turismaguovllu bivnnuheamos kulturčuozáhat. Go Siida rahppojuvvui ja dasa šadde birrajagáš bálvalusat, de Anára márkana dálveturisma lassánii sakka. Mátkeealáhusa birrajagáš lassáneami geažil Anára hoteallat leat viiddiduvvon ja guvlui leat vuođđuduvvon ođđa prográmmabálvalusfitnodagat. Siiddas leat jahkásaččat sullii  46 000 galledeaddji ja oktiibuot visttis leat sullii 110 000 áššehasgalledeami.

Sámemusea Siiddas doivot ahte gielda juolludivččii dás duohkoge doaibmadoarjaga, vai doaimmaid sáhtášii ainge ovddidit ee. iešruhtadeami gáibideaddji EU-fitnuid bokte. Sámemusea lea dehálaš bargoaddi, ovddidanfitnuid láidesteaddji ja turismma ealáskahtti, mii buktá gieldda investerema máŋggageardásaččat fas ruovttoluotta guvlui.

Lassedieđut:
Museahoavda Tarmo Jomppanen, tarmo.jomppanen(at)samimuseum.fi, tel. 0400 167 806