Sámemusea ja Davvi-Sámi luondduguovddáš Siidda geassi 2015

Siiddas doaibmá  sámemusea lassin Meahciráđđehusa luondduguovddáš, mii fállá vánddardanbagadallama Davvi-Lappi fiinna čuozáhagaide. Siiddas oaččut ovdamearkka dihte dieđuid Leammi álbmotmeahcis doaibmi ovttasbargofitnodagain sihke beaivválaš ruvttofanassáhtosteamis, mainna beassá návddašit duoddariid birastahtti goargadis johkaleagis. Meahciráđđehus fuolaha maiddái Anára gieldda turismainfos, ja nuba dieđut báikkálaš fitnodatolbmuid fállan bálvalusain sihke doaluin gávdnojit Siiddas.

Siidda čájáhusat leat dál vuostáiváldimin min geassegussiid. Golbma molsašuvvi čájáhusa doalvulit olbmo Várjavutnii, ovdanbuktet Antonio Briceño fiinna čuovgagovaid ja muitalit Čáziid veaga birra. Molsašuvvi čájáhusaid lassin Siidda bissovaš čájáhusain lea álo doarvái oaidnámuš daiddage, geat leat juo oahpásmuvvan daidda.

Sámemuseai gullevaš historjjálaš olgomusea rahppojuvvo vuot geasseáigodahkii. Olgomuseas beassá oahpásmuvvat ovdamearkka dihte Gollealbmá gámpái ja Tirro šilljobirrasii, ja dasa lassin sáhttá geahččalastit iežas njoarostandáidduid.  Olgomuseabiras lea doaibman juo 52 jagi, ja dasa lea maiddái ráhkaduvvon mobiilaoahpistanrusttet, mii videoiguin, govaiguin ja muitalusaiguin čalmmustahttá feara maid. Mobiilaoahpistanrusttegiin beassá vuđoleappot oahpásmuvvat Tirro šilljobirrasii ja oaidnit olgomuseas govvejuvvon prográmmaid.

Geassebaji áigge Siiddas lágiduvvojit maiddái máŋggalágan doalut. Anárvahkuid oktavuođas Siiddas lágiduvvo Olgomuseabeaivi, goas beassá oahpisteaddjiid bagadallama vuođul oahpásmuvvat olgomuseabirrasii, ja dalle čalmmustahttet ja vuvdet giehtadujiid ja maiddái manáid várás lea máŋggalágan prográmma.  Olgomuseabeaivi dollojuvvo duorastaga 23.7. diibmu 10 – 16. Dárkilet prográmma gávdno Siidda dáhpáhuskaleandaris  www.siida.fi.

Meahciráđđehusa Davvi-Sámi luondduguovddáš Siida lea mielde lágideamen Leammi vánddardanbeaivvi, mii dollojuvvo bearjadaga 24.7.  Suoma stuorámus álbmotmeahcis.  Dalle leat oahpistanfálaldagat, bargočájeheamit ja fanasreaissut Leammileahkái. Leammibeaivi gullá oassin Anárvahkuide, ja luondduguovddáš lágida dan searválagaid  Saariselän Sanomat -bláđiin ja Leammi fitnodatolbmuiguin. Dárkilet prográmma gávdno Siidda dáhpáhuskaleandaris.

Sámemusea bajásdoallá Nuortalaččaid Árbevierrodálu, mii maiddái rahppojuvvo geassái Čeavetjávrris.  Nuortalaččaid Árbevierrodálus lea smávva museabuvda sihke čájáhusbáiki ja olgomusea. Árbevierrodállu lea rabas geassemánu álggu rájes čakčamánu 25. beaivái diibmu 10 – 18, ja dohko beassá nuvttá sisa.

Meahciráđđehusa luonddustohpu Ohcejogas bálvala turisttaid geassebaji áigge Ohcejohnjálmmis.  Luonddustobus fidne vánddardanbagadallama ja doppe doaibmá maiddái Ohcejoga gieldda turismainfo. Dán guovllu historjjás, luonddus ja kultuvrra muitaleadji čájáhus ođasmahttojuvvui diibmá. Luonddustohpu lea rabas  9.6. – 18.9. vuossárggas bearjadahkii diibmu 10 – 18, ja dohko beassá nuvttá sisa.

Siida lea geassebaji áigge ( 1.6. – 19.9.) rabas beaivválaččat  9 – 19. Nuppi gearddis lea Restoráŋŋa Sarrit. Datge lea rabas beaivválaččat ja doppe fidne gaskabeaibiepmu čuožžu beavddis beaivválaččat 11 – 17. Dasa lassin fálus leat báikki alde láibojuvvon bullát ja eará herskot smávit nealgái.