Sámemusea oaččui mearkkašahtti girjeskeŋkema

Su girječoakkáldagas leat oktiibuot sullii 1750 stuhka.  Čoakkáldagas leat eanaš suomagielat girjjit muhto leat maiddái sámegielat ja earágielat girjjit. Čoakkáldagas gávdno viidát sierra perspektiivvaiguin davviguovlluid gieđahalli girjjálašvuohta muitalangirjjálašvuođas ja mánáidgirjjiin gitta dieđalaš prentosiidda ja raporttaide.  Čoakkáldaga girjjit leat háhkkojuvvon eanaš daid almmustuvvama áiggiid muhto maiddái boarráset girjjit 1900-logu álggogeahčen leat mielde dán čoakkáldagas.

Harald Vartiainen lea dađistaga dievasmahttán iežas čoakkáldaga badjel 50 jagi áigge. Son ii leat dušše čoakkildan girjjiid muhto lea maiddái lohkan viššalit girjjálašvuođa ja buđaldan Lappii guoskevaš áššiiguin.  Vartiainen lea leamaš guhká ee. Lappi Dutkansearvvi ja juo heaittihuvvon Lappi Čuvgehusearvvi lahttu. Su badjel 30 hildomehtera čoakkáldat lea sirdojuvvon Siidii Anárii ođđajagemánus 2011. Ovdal, 2004:s, Harald Vartiainen skeŋkii Sámemuseai davvisámegielat ja nuortalašgielat bláđiid jahkegerddiid.

Sámemusea lea váldán skeŋkenčoakkáldaga vuostái ja seammás váldán badjelasas čoakkáldaga dikšuma, ordnema ja indekserema.  Čoakkáldat namahuvvo skeŋkejeaddji mielde iežas ollisvuohtan, H. Vartiainena čoakkáldahkan. Sámemusea doaimma dáfus sullasaš skeŋkemat mearkkašit hui ollu.  Musea vuođđuduvvui juo 1950-logus muhto girje- ja bláđđečoakkáldagaid vurkegohte museagirjerádjui easkka 1998:s, go dálá Siida-visti doaibmagođii.

Sámemusea museagirjerádju lea oaivvilduvvon musea iežas dutkanatnui.  Alladássásaš giehtagirjerádju doarju museas ee. čoakkáldagaide ja čájáhusaide guoskevaš dutkama ja áššehasaide oaivvilduvvon diehtobálvalusa.

Sámemuseas lea ovttasbarggu Lapin Kirjasto –konsortioin Lappi Museokirjastoid oassin.  Sámemusea girjeráju girjjit indekserejuvvojit Lapin Kirjasto –vuogádahkii (www.lapinkirjasto.fi). Lappi girjerájut ja museat buvttadit ovttas maiddái Lapponica-diehtobálvalusa (www.lapponica.fi).

Lassedieđut:
Intendeanta Arja Hartikainen, tel. +358 (0)40 579 3313, arja.hartikainen(at)samimuseum.fi