Sámemusea Siida oaččui ruovttoluotta Anára gieldda doaibmadoarjaga

Anára gielddaráđđehus árvalii ahte gieldda jahkásaš doaibmadoarjja galggai geahpeduvvot beallái 2014:s ja ollásit heaittihuvvot 2015:s ng. Hálddašuvvon goluidlassáneami prográmma oassin. Anára gielddastivra jienastii goittotge čoahkkimisttis 12.9. gielddaráđđehusa árvalusa vuostá. Sámemusea oažžu ná iežas doaibmadoarjaga ovddeš sturrosažžan goittot boahttevaš jagi áigge.

Sámemusea Siidda hoavda Tarmo Jomppanen illuda ovttas Sámemusea bargoveagain positiivvalaš doarjjamearrádusas. Anára gieldda máhcahan doaibmadoarjja roahkasmahttá ja movttiidahttá min joatkit buori barggu sámekultuvrra ja mátkeealáhusa ovdii, dadjá Jomppanen.  Erenoamáš ilus Sámemuseas leat báikkálašservodagas boahtán nana doarjagis ja arvvosmahttimis, ja dan árvalit váikkuhan gielddastivrra mearrádussii.

Sámemuseai gieldda jahkásaš  50 000 euro doaibmadoarjja lea erenoamáš mearkkašahtti, dasgo dat addá museai vejolašvuođa jođihit aktiivvalaš báikkálašdoaimma. Sámemusea sáhttá doarjaga veagas dás duohkoge bajásdoallat ee. Čeavetjávrri nuortalašárbedálu, buvttadit museaoahpistanbálvalusaid beaiveruoktoahkásaččaide sihke skuvlamánáide ja fállat virkkosmahtti kulturbálvalusaid buohkaide.

Ovdalaš gielddastivrra čoahkkima lei ealaskas álbmotságastallan Sámemusea Siidda mearkkašumis gildii ja doaibmadoarjaga dárbbašlašvuođas. Museahoavda Jomppanen čuovui ságastallama, ja su mielas maiddái ieškritihkkii gávdnojit ákkat. Almmolaš ságastallamis bođii ovdan ahte guovllus eai várra dovdda doarvái bures musea máŋggabealat doaimma. Son áigu dás duohko bovdegoahtit gieldda virgeolbmuid ja luohttámušolbmuid báikki ala oahpásmuvvat Siidda doibmii ja doaluide.