Sámemuseavuođđudus cealká eret Skierrái guoskevaš láigo- ja ovttasbargosoahpamuša Meahciráđđehusain

Sámemusea dagai Skierrái guoskevaš láigo- ja ovttasbargosoahpamuša Meahciráđđehusain 2007:s. Dalle rahppojuvvon Vuovjjuš-vuođđočájáhus lea buvttaduvvon muhtumassii EU-ruhtadeami vuođul searválagaid Meahciráđđehusain ja Johtti Sápmelaččat -ovttastusain. Sámemusea oamasta guovllu luonddu ja sámekultuvrra ovdanbukti vuođđočájáhusas 40% ja Meahciráđđehus 60%, nu ahte sisabeassanbileahttaboađut juohkásit seamma gori mielde. Vuođđočájáhusa lassin Sámemusea lea ee. lágidan dáid maŋimuš jagiid Skierris moanaid molsašuvvi čájáhusaid ja oassálastán Heahtá márjjábeaivvi doaluid lágideapmái. Sámemuseas lea leamaš jagi 2007 rájes Skierris okta ollesáigásaš bargi. Láigo- ja ovttasbargosoahpamuš nohká miessemánu 2011 loahpas ja seammás nohká maiddái guovlodoaibmabáikki bargi bargogaskavuohta.

Geassádeami duogážin leat Skierri-čuozáhaga bajásdoallamis ja láigguin boahtti menddo stuorra golut boađuid ektui. Sámemusea geahččalii golmma jagi áigge ee. ođasmahttit Skierri sisaboahtinhálla doaibmalanjaid nu, ahte buot čájáhusaid livččii sáhttán bidjat ovtta sisabeassanbileahta duohkái ja geahččalii ovddidit museabuvdadoaimma Skierris ja áigáioažžut ođđa čuozáhatoahpistanrusttegiid, main maiddái Sámemusea namma livččii máinnašuvvon. Ovttasbargoguoibmi Meahciráđđehus ii lean gearggus čuozáhaga oktasaš ovddidandoaimmaide. Skierri-čuozáhaga gallestallimearit leat vuollin ja ng. nuvttágallestalliid ossodat lea stuoris Siidda ektui, eaige čuozáhaga sisabeassanbileahttaboađut leat leamaš dakkárat go lei vurdojuvvon.

Sámemuseas ja Meahciráđđehusas lea Siiddas lihkostuvvan ovttasdoibmamálle, mas Musea ja Luondduguovddáš buvttadeaba bálvalusaid raddálagaid ja ovttasárvosaččat, ja Siida leage okta Lappi bivnnuheamos gallestallančuozáhagain. Sámemusea sávai Skierri ovdánit sullii seamma vuogi mielde. Skierri-čuozáhagas lea jámma stuorra vuolláibáza, ja mátkkálaččaid meari oppalaš geahppáneapmi bággejit Sámemuseavuođđudusa dán geassádanmearrádussii.

Vuovjjuš-čájáhus bissu goittotge Skierris vaikko Sámemusea geassádage láigolačča rollas.  Sámemusea ráđđádallá ođđa ovttasbargovejolašvuođain guovlludoaimma joatkin dihte eanodatlaš Johtti Sápmelaččat -ovttastusain.

Sámemusea váldoruhtadeaddjin doaibmá Oahpahus- ja kulturministeriija. Maiddái Anára gielda ruhtada dán mearkkašahtti gallestallančuozáhaga ja kulturlágádusa doaimma jahkásaš ruhtadoarjagiin.  Sámemusea dárbbaša almmolaš ruhtadeami lassin maiddái iežas boađuid, maid dat fidne ee. sisabeassanbileahtaid ja bálvalusaid vuovdimis sihke museagávpedoaimmas.

Lassedieđut:
Museahoavda Tarmo Jomppanen, tel. 0400 167 806