Sámi sohkabuolvvat ja oktasaš muitalus -fidnu álgá

Sámemusea Siida álggaha Sámi sohkabuolvvat ja oktasaš muitalus -fidnu cuoŋománus 2016. Fidnu ulbmilin lea sámi árbedieđu vurken servošiid dárbbuin. Fidnui sáhttet oassálastit sámi servošat, ovdamearkka dihte servviid, skuvllaid dahje giliid bokte. Dahje sáhtát searvat fidnui bearašin, dahje siidan! Sámemusea addá ideaid ja boktala fárrui, vurkema fáttáid ja vugiid evttohit sámeservošat, mat oassálastet fidnui. Sámemusea vállje evttohusain daid, maid lea vejolaš ollašuhttit fidnu resurssaid ja áigedávvaliid dáfus.

Dat mii vurkejuvvo, sáhttá leat máinnas, muitalus, lávlla, luohti, duodječehppodat, bargovuohki dahje vaikko diehtu ja máhttu, mii guoská man nu báikki. Dat sáhttá leat maid dušše okta dábálaš beaivi iđidis gitta eahkedii. Mas don beroštat? Maid leat álot háliidan jearrat áhkus, muhto it leat duostan? Háliidatgo diehtit, mo ovdal lávejedje ovttastallat? Hás mii dáhkat filmmaža gámasuinniid čuohppamis? Leago din gili sogaid vuottamállet ain dieđus? Dovdetgo din guovllus vel sámi báikenamaid? Čoaggitgo gili boares govaid, skánnet daid ja geahččalit dovdat olbmuid ja báikkiid? Hás mii málestit njealji nástti sámi mállásiid ja govvet dan!

Árbedieđu vurkema lassin ulbmilin lea sierra sohkabuolvvaid gávnnadeapmi ja dieđuid ja dáidduid sirdin ovddos guvlui. Fáttá mielde sáhttá geavahit sierralágan vurkenvugiid. Loahppaboađus sáhttá leat teaksta, govva, jietnabáttit ja videot, ráidogovat – dahje vaikko dávvirat. Loahppaboađus báhcá dahkkiide illun ja atnui, dasa lassin dat vurkejuvvo maid musea čoakkáldagaide boahttevaš buolvvaide. Doaibmaulbmilin lea, ahte sierra sohkabuolvvaid iešguđetlágan čehppodat dievasmahttá nubbi nuppi.

Sámemusea Siida ohcá ovttasbargoguimmiid fidnui. Háliidivččetgo don váldit oasi? Fidnu ordne searvan servošiidda deaivvademiid, mas sohppojuvvojit fáttát ja doaibmaprinsihpat. Fidnu bistá cuoŋománus gitta golggotmánnui, nuba fáttáid galgá heivehit fidnu doaibmaáigodahkii. Maid fidnui oassálasti servošiid mearri váikkuha dasa, maid mii ovttas geargat bargat. Fidnu fállá veahkkeneavvuid ja rávvema, muhto ii sáhte máksit oassálastiid goluid.

Sámemusea Siida lea ožžon Musealágádusas ruhtadeapmi innovatiivvalaš ja oassálasti Sámi sohkabuolvvat ja oktasaš muitalus -fidnui. Prošeavttas Sámemusea geahččala vuosttaš geardde doaibmavuogi, mas árbedieđu vurkejit sámi servošiid dárbbuin. Sámemusea lea rabas ja movttegis mielain go beassá oahppat ja hukset ođđa doaibmamálle fidnus.

Sámemusea illuda go lea ožžon ruđa sámi árbedieđu vurkemii ja bovde sámeservošiid fárrui fidnu ollašuhttimii!

Oktavuođadieđut ja diđoštallamat:

dutki Päivi Magga 040 180 1501 paivi.magga@samimuseum.fi

3.4.2016 rájes prošeaktabargi Maiju Saijets 040 576 39 78 maiju.saijets@samimuseum.fi