Sápmelaš - That's it!

Sámemusea Siida dokumenterii jagiid 2009-2011 sámenuoraid eallima searválagaid davviriikkaid eará sámemuseaiguin. Prošeavtta ulbmilin lei ee. movttiidahttit sámenuoraid meroštallat ja vurket iežaset kulturárbbi.

Prošeavtta áigge museaid bargoveahka, prošeaktabargit ja guđege guovllu nuorat guorahalle ovttas dan, mat áššit museaide ja arkiivvaide galget dán áiggis vurkejuvvot. Nuoraid govven oanehisfilmmat ja sin birra dahkkojuvvon oanehis jearahallamat addet buori gova das, makkár lea leat sámenuorra otnábeaivve ja makkár jurdagat nuorain leat boahtteáiggi hárrái.

Ruoŧas ja Norggas prošeaktaovttasbargu dahkkojuvvui ain dainna skuvllain, mii lei guđege oassálasti musea lahkosiin.  Suoma bealde dokumenterenguoibmin ohccojuvvojedje veardádallan dihte citysámi nuorat.

Prošeavtta áigge nuorat dokumenterejedje iežaset eallima čuovgagovaiguin ja videogovvema bokte. Prošektii searvan nuorat ožžo iežaset atnui videokameraid ja sii besse oahpásmuvvat čuovga- ja videogovvemii sihke editeremii. Nuoraid gárvvistan ruoktoalbumiin leat mielde muitalusat, čuovgagovat ja sárgumat sin iežaset eallimis, mánnávuođas ja bearrašis.

Nuorat oassálaste viššalit Interneahtta-siidduid beivemii nu, ahte čálašedje bloggaid ja buvttadedje dohko čuovgagovaid ja filmmaid. Dáidda siidduide sáhttá oahpásmuvvat čujuhusas www.samiyouth.org.

Sámenuorat-prošeakta lei davviriikalaš sámemuseaid ja sámenuoraid ovttasbargoprošeakta.  Prošeavtta álggahii Duottar- ja sámemusea Ájtte Ruoŧa Johkamohkis. Ovttasbarggus ledje mielde Sámemusea Siida Anáris, mearrasámiid kultuvrra ovdanbukti musea Norgga Vuonnabađas sihke Saemien Sijte -ovttastus Norgga lullisámeguovllus Snåases. Siida-musea prošeaktabargin lei čuovgagovvadáiddar Terhi Silenius. Prošeavtta ollašuhttin ruhtaduvvui Interreg IVANord -oasseprográmma váriiguin.

Čájáhusa leat dievasmahttimin sámeguovllu sierra báikkiin lágiduvvon bargobájiid bohtosat. Bargobájit leat lágiduvvon searválagaid Sámi mánáidkulturguovddážiin čakčat 2011.

Lassedieđut:
Intendeanta Arja Hartikainen, Sámemusea Siida, tel. +358 (0)40 579 3313, arja.hartikainen(at)samimuseum.fi, sihke www.samiyouth.org