Vapriikki skeŋke iežas sámečoakkáldaga Sámemusea Siidii

Dávvirskeŋkejupmi luohpaduvvo Vapriikis gaskavahku 29.4.2015 dbm 12:00. Media lea buresboahtán dán dilálašvuhtii.

- Sáhttá jurddašit ahte dávvirat leat leamaš lullin luoikkasin  110 jagi, ja dál dat leat fas máhccamin dohko gos dat leat vuolgán, dadjá sadjásaš čoakkáldathoavda  Teemu Ahola Vapriikis.

- Skeŋkejupmi dievasmahttá mealgat Siidda dávvirčoakkáldaga boarráseamos oasi ja dáid dávviriid máhcaheapmi davás mearkkaša erenoamáš ollu sámemuseai sihke sámeservošii, illudeaba Siiddas Tamperei boahtti čoakkáldatmeašttir Marjo-Riitta Rantamäki ja amanuensa Anni Guttorm.

Álgoálggus Häme musea čoakkáldagaide gullan dávvirat leat leamaš ovdanbuktimin sámekultuvrra tamperelaš museadoaimma álgoáiggiid. Dán čoakkáldagas leat sullii golbmalot dávvira, earret eará sámetekstiillat ja gápmagat, ja maiddái geres ja sámeniibi. Dáid dávviriid lea čoaggán tamperelaš dáiddár  Gabriel Enberg 1905:s, go jođii málenmátkkis Anára sámegilážiin. Maŋit jage son vuvddii dáid dávviriid Häme museai ja dan maŋŋá sámedávvirat leat gullan Tampere museaid čoakkáldagaide.

Čoakkáldaga sirdimiin Tampere musea háliida máhcahit dieid dávviriid fas daid ruovttuguvlui ja sámeservošii, masa dat gullet. Sirdin lea maiddái čielga mearka museaid riikkadási čoakkáldatovttasbarggu ovdáneamis.

2009:s vuođđuduvvon museaid riikkadási vurkkodan- ja čoakkáldatovttasbargofierpmádat TAKO, masa maiddái Tampere museat gullet, lea viggan mearrediđolaččat meroštallat kulturhistorjjálaš museaid vurkkodanvásttuid.  Vurkkodanvástojurddašeamis museat juogadit riikkadási vásttu dihto temáid vurkemis iežaset čoakkáldagaide.

Dien proseassa oassin museat sáhttet sirdit iežaset hálddašan čoakkáldagaid daidda museaide, maid váldovástun lea vurkkodit guoskevaš čoakkáldagaid ja maid duohken lea dáid čoakkáldagaid spesiála áššedovdamuš. Sámečoakkáldaga sirdin lea konkrehtalaš mearka museaid lassánan ovttasbarggus ja hálos ovddidit Suoma museaid čoakkáldathálddašeami.

Lassedieđut:
Teemu Ahola, Vapriikki, sadjásaš čoakkáldathoavda, tel. 040 761 5905
Marjo-Riitta Rantamäki, Sámemusea Siida, čoakkáldatmeašttir, tel. 040 571 5670
Sari Valkonen, Sámemusea Siida, museahoavda, tel. 040 767 1052