Vilda duoddarat – musihkkaseminára 15.8.2015 dmu 12–14 Sámi musea Siiddas

Eanodagas eret leahki juoigi ja jietnadáiddár Wimme ovttastahttá iežas musihkas sierralágan juoiganteknihkaid ja modearna lávlunvugiid. Wimme sáhkavuorus gullat su guhkesáigásaš barggus luđiin, man vuolggasadjin lea eanodatlaš juoiganárbevierru. Son muitala maiddái juoigamis sierralágan dilálašvuođain.

Biret Ristin Sara lea sihke árbevirolaš ja modearna luođi meašttir Dážabeale Sámis Kárášjogas. Son lea maiddái ságajođiheaddjin davviriikkalaš Juoigiid searvvis, mii lágidii giđđat 2015 ságastallandilálašvuođa luođi ja Sámi musihka čiegus arvvuin. Sara sáhkavuorus gullat dan ságastallama temáin ja árvvuin, maid luođi bokte sirdit.

Gárasavvonis bajásšaddan juoigi Inga-Máret Gaup-Juuso bargá aiddo vuosttaš skearruinis, mii ovttastahttá árbevirolaš ja modearna luođi popmusihkkii. Su sáhkavuorru gieđahallá su oktavuođa ja čatnosiid luohtái: bajásšaddama juoigamii ja árbevirolaš ja modearna luđiid ovdanbuktima.

Seminára loahpaha nuorra juigiid joavku, Oarjánnieddat Gárasavvonis. Joavkkus leat oappážat Inger-Anni ja Máret-Elle Valkeapää ja Maren Elle Mäkitalo. Sii leat oahpaheaddji Anna-Reetta Niemeläin ohcan iežaset guovllu boares luđiid arkiivabáttiin ja movttáskan juoigat. Semináras gullat maid Anna-Reetta Niemelä dearvvuođat, mas son muitala juoigama oahpaheamis ja oahppamis.

Vilda duoddarat –musihkkaseminára lágida Sámi musea Siida ja seminárii lea sisabeassan nuvttá. Seminára gielat leat davvisámegiella ja suomagiella, dulkon lea ordnejuvvon. Bures boahtin!