Vánddardeaddjit-čájáhus boahtá Anára Siidii

Dán áiggi olmmoš čohkká eanaš oasi dan áiggis, man son lea gozuid alde. Suoma njunuš luonddugovvejeaddji Jorma Luhta válljii earáláhkai. Son vánddardii logi jagi Suoma, Ruoŧa ja Norgga árktalaš guovlluin ja geahččalii juksat oktavuođa eatnamii ja birrasii ja das son maid lihkosmuvai.

“Geassit 1959 dempon áhččán maŋis njelješgeainnus Veahčajávrri guvlui. Muittán loahppameahttun viiddis ruonás soahkevuvddiid, čarkosiid uhca láddožiin, gálašeddjiid spinja, muhto  nannosamosit gápmagiid ja gaccaid vuolde gollan bálgá ja dan mohkiid. Lávkon seamma geainnu vihttalogi jagi maŋŋelis. Máhtu lei borran soahkevuvddiid čáhppadin, mohtorfievrrut ledje viiddidan boazobálgá luoddan ja jekkiid bokte luodda viidon čuđiid mehteriid govdadin. Eanaš áššit, maid oidnen duoddaris ja balsajekkiin, nanosmahtte mu jurdagiid das, ahte duottarluondu ii veadján nu bures.” govvida Jorma Luhta dovdduidis.

Vánddardantuvrrat leat vurkejuvvon govaide ja govat leat beassan čakčat 2014 almmustuvvan Vaeltajat-girjái. Dát čájáhus, mii Siiddas rahpasa, vuođđuduvvá girjji govaide.

Jorma Luhta lea váldán govaid badjel vihttalogi jagi. Jagi 1973 rájes govven ja čállin lea leamaš su áidna dienas. Sutnje lea mieđihuvvon guktii čuovgagovvema stáhtabálkkašupmi. Dasa lassin son lea ožžon Oulu leana dáiddabálkkašumi ja guktii lea su girji válljejuvvon jagi buoremus luonddugirjin.

Lassedieđut:

Spesiálaplánejeaddji Pasi Nivasalo, Meahciráđđehus tel. 040 5263 392, š-poasta: pasi.nivasalo(at)metsa.fi
Govvejeaddji Jorma Luhta, tel. 0400 191 438