Čáziid veahka ovdan luondduguovddáš Siidda ođđa čájáhusas

Petri Nevalainen lea govven eallinagi. Son lea eret Pirkanmaas, ja sus leat leamaš čájáhusat Lulli-Suoma gávpogiid lassin maiddái olgoriikkain.  Muoras gahččan – Čáziid veahka  -čájáhus ii leat leamaš goassige ovdal ovdan eará sajis muhto dán háve čájáhusbáikki lei hui álki válljet.

-Gal Anár ja Siida leat Čáziid vehkii áidna rivttes vuolginsadji", dadjá Nevalainen. Son lea čohkken dán čájáhusa juo moanaid jagiid, geasi áigge materiála lea háhkkojuvvon Anárjávrri gáttiin ja ieš dat govven lea dáhpáhuvvan su studios. Čuovgagovvejeaddjin son háliida áinnas ráhkadit buriid govaid, main lea čieŋalvuohta.

-Mu mielas govva lea buorre dalle go dat duođaid eallá", árvala Petri Nevalainen. Čájáhuslanjas olbmot besset oaidnit fámolaččat buvttaduvvon čáhppesvilges govaid, main muhtumat leat šiega njealjehasmehtera sturrosaččat.

Áibbas álggu rájes su ulbmilin lea leamaš váldit beali dáinna čájáhusain.

- Dálá servodagas luondu oidnojuvvo dušše resursavuorkán, ja danin háliidin buktit ovdan iežan oainnu, muitala Nevalainen. - Gal dát čájáhus váldá nannosit beali luonddu beales.

Nevalainen lohká iežas maiddái sávvat ahte son dáinna čájáhusainis sáhtášii bissehit olbmuid jaskkodit oanehassii.

­- Olbmot leat nu gergosat vajálduhttit dan mii buot luonddus gávdno. Jos olbmot asttašedje orustastit, de dán máilmmi sáhtášii oaidnit áibbas earáláhkai, hoahkala Petri Nevalainen.

Olmmoš sáhttá vehážiid jaskkodišgoahtit, vaikkoba vuos dán čájáhussii oahpásmuvvamiin. Figuvrraid guorahallama bokte son fuobmá ođđa áššiid ja ja sutnje šaddá miella geahčadišgoahtit ođđa čalmmiiguin birrasa. Muoras gahččan – Čáziid veahka -čájáhus lea oaidninláhkai Davvi-Sámi luondduguovddáš Siiddas 1.5. rájes gitta čakčamánu lohppii.

Lassedieđut: Davvi-Sámi luondduguovddáš Siida, siida(a)metsa.fi, 0205 64 7740