Suomagielat oahpaheaddjit ballet barggu massimis Gielddaráđđehus guođđá sámegielat virggiid deavddekeahttá Ohcejoga gielddaráđđehus lea geassán ruovttuluotta guokte guovttegielat oahpaheaddji virggi deavdinlobi. Ái lea loktejuvvon gielddaráđđehussii dannego Oahpaheaddjiid Ámmátlihtu báikkála ossodat ballá lahtuidis báhcimin barggu haga.
Oahpaheaddjiid Ámmátlihtu váldoluohttámuolmmo Ohcejogas Jorma Autio ja lihtu ságadoalli Kyllikki Antila leaba vuolláičállán gáibádusa gielddaráđđehussii lihtu beales.
Reivves soai imatallaba manne gielda almmuha ohcanláhkai oahpaheaddjivirggiid seammás go muhtin oahpaheaddjit dáidet báhcet doarvái diimmuid haga ja sáhttet addat oasseáigevirgái dahje bággolupmui.
Čuvgehuslávdegotti ságadoalli Kati Eriksen lohká YLE Sámi Radioi, ahte Oahpaheaddjiid ámmátlihttu ii leat oon doarvái dieđuid ái birra. Diimmut eai váillo sámegielat, muhto ovttagielat oahpaheaddjiin.
Gielddaráđđehusa mearrádus
Gielddaráđđehus lea gieđahallan ámmátlihtu reivve 30.03. 2010 ja dahkan guovtteoasat mearrádusa.
1. Antti Katekeetta evttohusa mielde guovtti guovttegielat oahpaheaddjivirggi deavdinlohpi gessojuvvo ruovttuluotta ja bissova dáiddaávnnasoahpaheaddji virgi devdojuvvo baicce mearreáigásaan áigodahkii 14.08. 2010 – 4.6. 2011.
2. Esko Härkösa evttohusa mielde ásahuvvo bargojoavku mii čielggada gieldda skuvllaid oahpaheaddjivirggiid dili.
Tapiola vuosttaldii
Sámelistta áirras Ilmari Tapiola evttohii deavdit buot virggiid maidda lei juo addojuvvon deavdinlohpi, muhto dan ii dorjon oktage eará gielddaráđđehusa áirras. Tapiola maid evttohii ahte galgá oaut ovdan sámegielat ja suomagielat oahpahusa goluid sierra. Eai dange dorjon eará áirasat.
Sivvan dasa ahte gieldaráđđehus ii háliit čájehit sierra suomagielat ja sámegielat oahpahusa goluid, dáidá leat ahte dalle buohkat oidnet ahte sámegielat oahpahus lea nuvttá gildii ja suomagielat oahpahus lea divrras.
Virggit mat báhcet deavddekeahttá leat sámegielat ovdaluohká oahpaheaddji Gáregasnjárgga skuvllas ja sámegielat luohkkáoahpaheaddji Ohcejotnjálmmi skuvllas. Čuvgehuslávdegotti jođiheaddji Kati Eriksen čilge YLE Sámi Radioi, ahte mearrádus čuohcá sakka sámegielat oahpahussii.
Boasttu dieđut YLE Sámi Radios
Sámegielat oahpaheaddjiid bálkkáid máksá dán áiggi stáhta ollásit. Liikká Ohcejoga gielddaráđđehusa ságadoalli Antti Katekeetta lohká YLE Sámi Radioi, ahte dán áis ii leat jearaldat oahpahusgielas, muhto ruhtaváttisvuođain.
YLE Sámi Radioge almmuha ái bajilčállagis “Ohcejoga gielda ruhtaváttisvuođaid siste - guođđá deavddekeahttá guokte sámegielat oahpaheaivirggi” juoga mii dieđusge ii doala deaivása.
Bargojoavkku lahtut
Bargojoavkkus mii galgá čielggadit oahpaheaddjivirggiid dili, leat fárus Maritta Lukkari, Raimo Hekkanen, Rauna Guttorm, Aslat Jon Länsman ja Esko Härkönen. Čálli lea Arja Alaraudanjoki. Gieldaráđđehus ii válljen jovkui ovttage čuvgehuslávdegotti lahtu.
|
Vástit dán cealkámuššii