Sámegielat oahppiid lohku stáđis Suomagielat mánát eai oahpa sámegiela Leat seammá ollu mánát dán jagi go mannan skuvlajagi sámegielat oahpahusas Ohcejoga skuvllain. Muhto suomagielat mánát leat heaitán oahpahallamis sámegiela.
Sámedikki skuvlen- ja oahppomateriáladoaimmahat lea aiddo almmuhan loguid das man ollu mánát ja nuorat lohket sámegiela Suoma beale skuvllain.
Ohcejogas leat 66 oahppi sámegielat oahpahusas. Lohku lea juste seammá go diibmá.
Eanemusat Gáregasnjárggas
Jos geahččá skuvllaid mielde de leat dattetge uhca nuppástusat. Buoremus nuppástus lea Gáregasnjárgga skuvllas gos 34 oahppi leat sámegielat oahpahusas. Dat leat njeallje eanet go diibmá.
27 oahppi leat sámegielat oahpahusas Ohcejotnjálmmi skuvllas, guokte unnit go diibmá. Guokte oahppi leaba sámegielat ohpahusas Njuorggáma skuvllas, okta uhcit go diibmá. Golmmas leat ges fárus Sámelogahaga sámegielat oahpahusas, okta uhcit go diibmá.
Guokte oahppi Gáregasnjárgga skuvllas lohkaba sámegiela eatnigiellan, muhto oažžuba eará oahpahusa suomagillii. Diibmá ledje ge vihtta oahppi Sámelogahagas geat lohket sámegiela eatnigiellan, muhto muđui ledje suomagielat oahpahusas. Dál ii leat doppe oktage dakkár oahppi.
Eai oahpa suomagielat luohkáin
Suomagielat oahpahusa leat badjelaš 50 oahppi Ohcejoga skuvllain. Dušše 13:s dain lohket sámegiela eaktodáhtolaš giellan dahje válljenávnnasin.
Gáregasnjárggas ii loga oktage oahppi sámegiela válljenávnnasin dahje eaktodáhtolaš giellan vaikko suomagielat oahpahusas leat sullii logi oahppi.
Vihtta oahppi Ohcejotnjálmmi skuvlla suomagielat luohkáin oahpahallet sámegiela. Dat lea čieža uhcit go diibmá vaikko suomagielat oahpahusas leat badjelaš 20 oahppi. Njuorggámis leat dakkár oahppu čieža oahppis, seammá go diibmá.
Sámelogahaga suomagielat oahpahusa 12 oahppis OKTA geahččala oahppat sámegiela. Dat lea okta uhcit go diibmá.
Rivttes dieđut?
Daid loguid lea Sámediggi ožžon Ohcejoga gielddas 20.09. 2010, ja leat uhcit nuppástusat dáhpáhuvvan dan maŋŋá. Omd. leat dál eanet oahppit go 27 Ohcejotnjálmmi sámegielat oahpahusas. Jos gávdná eará boastu dieđuid, de sáhttá lasihit rivttes dieđuid kommentára báikái.
Livččii maid buorre jos gii nu máhttá árvalit dahje vaikko vel diehtá muitalit manne dušše njealját oassi suomagielat luohkáid oahppiin geahččalit oahppat sámegiela. Mii bat sáhttá leat sivvan dasa?
|
