Mii leat ovdal čállán das go Ohcejotnjálmmi skuvla sáddii ruovttuide dieđu dušše suomagillii Sámi mánáid ja nuoraid dáiddadáhpáhusas. Veahkkehoavda Tarja Halonen čilgii dalle ahte sii eai lean ožžon mange lágan dieđuid Sámedikkis ja lei prenten suomagielat prográmma interneahtas. Sámegielat prográmma eai lean gávdnan.

Dál čilge Sámedikki áššemeannudeaddji ahte sii leat sádden reivve Ohcejotnjálmmi skuvlii vaikko Halonen ii leat ožžon dan. Reive lei dušše suomagillii.

Áššemeannudeaddji čilgehus lea ná:

"Mun šállošan dan, go in lean sádden skuvllaide sámegielat prográmma. Dan dieđusge livččen galgan bargat. Dán áššis geavai nu, ahte mus lei nu issoras hoahpu maŋimus beivviin ovdal dáiddadáhpáhusa, ahte in geargan jorgalit ja sáddet sámegielat prográmma skuvllaide. Virggálaš prográmma (mii lei measta seammalágan go skuvllaide sáddejuvvon suomagielat prográmma) lei gal neahttas maiddái sámegillii ja skuvla livččii dan doppe sáhttán prentet.

Dáiddadáhpáhusa buot virggálaš dieđut leat Sámedikki neahttasiidduin buot golbma sámegillii. Ieš dáiddadáhpáhus lei measta oallásit sámegillii ja dat lihkostuvai dan jagi bures."

Min ávžžuhus Sámediggái lea ahte galgá vuos čállit sámegillii ja sáddet dušše sámegillii Sámeguovllu skuvllaide ja eandalit Ohcejohkii. Lea han skuvla guovttegielat ja lea skuvlla ovddasvástádus jorgalit suomagillii dárbbu mielde. Min vásáhus lea maid ahte jos juoga lea čállojuvvon sámegillii, de vuostáiváldi astá álo jorgalit dan.