Harald Gaski

Min oabbáorganisašuvdna, NFF, lea dál áŋgiruššamin váfistit fágagirječálliid vuoigatvuođaid interneahttageavaheami vuostá almmá mávssekeahttá buhtadusa sekundeara – dahje nuppá-dassii geavaheami – vuoigatvuođaid ovddas.

Dat mearkkaša ahte lágádusat mat leat normalkontrávtta mielde ožžon vuoigatvuođa almmuhit teavsttaid girjjiin ja áigečállagiin, hálidit geavahit seammá vuoigatvuođa bidjat teavsttaid internehttii ge. Álggus sii dan dahket nuvttá, dassá go beroštupmi lassána, de giddejit portála, ja olmmoš gii hálida ávkkástallat teavsttaiguin, ferte dasto máksit lágádussii vissis sumi lohkan-vuoigatvuođa ovddas. Dát guoská vuosttažettiin dakkár teavsttaide maid ii šat fidne oastit danin go girjjit leat buot vuvdon, dahje duššaduvvon nugo lágádusat dahket dan áigái amaset dárbbašit máksit vearu stuorra vuorkkáid ovddas. Dán rádjái dat lea vuosttažettiin leamaš áššin Universitehtagoastádusa ja NFF gaskkas, muhto searvvi bealis ballet eará lágádusaid dárkilit čuovvut ášši, go dás sáhttá leat sáhka oalle stuorra ruhtasumiin ovddosguvlui.

NFFa jahkečoahkkimis dát lei sierra áššiin, dan dihtii go searvvi stivra lei bivdán lobi fágačálliin kollektiivvalaččat beassat min buohkaid ovddas šiehtadallat lágádusaiguin nuppes-geavaheami vuoigatvuođaid hárrái. Stivrra evttohus dohkkehuvvui ja NFF lea dál bivdimin čoahkkimiid Norgga stuorámus lágádusaiguin sihkkarastit iežas lahtuid vuoigatvuođaid buhtaduvvot jus girje- ja áigečálateavsttat biddjojit online.

SFSas čuovvut mo ášši ovdána NFF ja Norgga girjelágádusaid gaskkas, ja vuordit ahte min sámi čálliid vuoigatvuođat ge vuhtii váldojuvvojit boahttevaš šiehtadallamiin. SFS ovddasteaddji goit bivddii NFFa muitit maiddá unnitlogugielaid čálliid beroštumiid áššis, ja SFS gis bealistis dárkilastá mo sámi lágádusat láhttejit teavsttaid nuppádassii geavaheami vuoigatvuođaiguin.