Sámediggi ferte ásahit čielgasat njuolggadusaid guovttegielalašvuođa ruhtageavaheapmái. Gieskat almmuhuvvon evalueremat čájehit ahte gielddat geavahit sámigiela ruhtadoarjagiid eará doaimmaide. Danin ferte Sámediggi farggamusat evalueret guovttegielalašvuođa ruhtageavaheami buot gullevaš gielddain ja fylkkagielddain.

Dál jo lea čielggas ahte gielddain ferte gáibidit dárkkistuvvon rehketdoaluid guovttegielalašvuođaruhtageavaheamis jos galgá sáhttit árvvoštallat sin guovtte-gielalašvuođadoaimmaid. Gielddaid jođiheaddjiid beroštupmi sámegiela-ovddideamis galggašii buoriduvvot. Gielddaossodagain gos sámegiella lea bures ovdánan, čájeha ahte hoavddain lea buorre dáhtolašvuohta sámegielas ja sámekultuvrras.

Sámediggi berre maiddái árvvoštallat galggašii go ásahit guovtte-gielalalašvuođa modeallagieldda gos visot ođđaáigásaš gaskaoamit geavahuvvojit ovddidit sámegiela. Dát sáhtašii leat modeallan eará ásahusaide.

Lassin lea dehálaš ahte rievdaduvvo resurssageavaheapmi dan láhkái ahte gelbbolaš ásahusat ja joavkkut gos sámegiella ja kultuvrra doaibmá, ožžot eanet geavatlaš ovddasvástádusa čađahit giellaovddideami doaimmaid.

Sámediggeráđi dieđáhusas sámegiela birra oaidná dan ahte lea dárbu ođastit sihke sámelága ja giellanjuolggadusaid. Dehalaš lea árvvoštallat sankšuvnnaid gielddaide ja fylkkagielddaide jos eai čuovo njuolggadusaid.

SFS oaidná dárbbašlažžan buorebut gozihit ruhtageavaheami giellalaga áigumušaid ektui.

Dán rádjai leat hálddašanguovllu gielddat menddo iehčanassii beassan giellaruđaid geavahit, otnášii árvvu mielde 275 mill. kr., 37 mill. kr. dán jagi, geavahit dadjat juo eaktodáhtolaččat almmá lágiduvvon áigumušaid ja ovddideaddji doaimmaid haga.

SFS vuorddášii ahte SFS beassá váikkuhit ruhtageavaheami vuoruheami.

SFS lea ain vuordimin ahte Sámediggi doallá stuorit giellaseminára gosa resursaolbmot čoahkkanit.

Ođasmahttán 10.06.2005
Almmuhan: Mihkku Solbakk