Nils Jernsletten (Juho Niillas) lea nammaduvvon Sámi fágagirjjálaš čálliid- ja jorgaleaddjiidsearvvi vuosttas gudnimiellahttun. Juovlamánu álggus oaččui Niillas diploma go searvvi stivrajođiheaddji Harald Gaski ja searvvi čállingottejođiheaddji John T. Solbakk geigiiga searvvi diploma Niillasii.

Juho Niillas lea olles bargoeallimis čađa rahčan loktet sámegiela árvvu sihke sápmelaččaid iežamet gaskkas ja stuorátservodagas. Niillas lea su eatnat ámmáhiid bokte leamaš mielde viiddideamen dieđu ja máhtu sámekultuvrra birra, ee. leamaš son eanaš oasi SFSa miellahtuid, ja muđui ge dálá čálli sápmelaččaid, sámegiel oahpaheaddjin universitehtas.

Giellaráđi vuosttas jođiheaddjin Niillas barggai buoridan dihtii sámegiela geavahusa rámmaeavttuid servodagas, ja son leamaš mielde almmolaš viesuid galbemin sámegillii. Ođđa Biibbaljorgaleami álgo-prošeaktajođiheaddjin su ánsun lea maiddá ahte dálá buolva beassá lohkat Biibbala áddehahtti gillii. Juho Niillas lea dasa lassin buvttadan sihke fága- ja čáppagirjjálašvuođa čállosiid sámegillii. Dán vuođul lea lunddolaš ja vuogas válljet su SFSa vuosttas gudnimiellahttun.

SFS vuođđuduvvui 1992, ja searvvis leat dál sullii 70 miellahtu. Harald Gaski lea SFSa stivrajođiheaddji ja čállingotti jođihii John T. Solbakk. Kontorčujuhus lea Fitnodatgeaidnu 13 Kárášjot márkanis.