SFS viiddiduvvon stivra, mas sadjásašlahtut ledje mielde, meannudii ášši 2006 jahkečoahkkima meannudeami ja mearrádusa vuođul. Stivra mearridii fállat áigečállaga almmuhanovddasvástádusa ČálliidLágádussii. Stivra lei hástán stuorimus sámi girjegoasttideaddjiid buktit fálaldaga, ahte válddášii go oktage badjelasas dákkár hástalusa. ČálliidLágádus lei áidna mii arvvai fállat goit iskat áigečállaga vejolašvuođaid.

Stivrra mearridii čuovvovaččat:

SFS viiddiduvvon stivra (fástalahtut oktan sadjásašlahtuiguin) fállá ČálliidLágádus vuođđudussii váldit olggosaddi ovddasvástádusa, háhkat áigečállagii dárbbašlaš bistevaš ruhtadeami, ja bidjat dasa doaimmaheaddji jos bistevaš ruhtadeapmi ollašuvvá. Áigumuš galgá leat dat ahte lagas boahtte áiggis galget ilbmat 4 60-siidosaš nummira jahkái.

Geahča stivrra 08.10.06 bevadegirjji dáppe.

Joatkka ii leat ruhtaduvvon

Sámediggi ii bidjan 2007 bušehttii ruđa Sámis áigečállagii. ČálliidLágádusa ja SFSa ovddasteaddjit čoahkkimaste Sámediggeráđi ovddasteaddjiiguin ovdal bušeahttameannudeami. Ávžžuhus lei ahte biddjošii NOK 300.000,- 2007 bušehttii. Nu ii dattege dáhpáhuvvan. Goasttideaddji lea goit joatkimin ruhtadanáššiin, ja guorahallamin vejolašvuođaid almmuhit vel moadde nummira gaskaboddosaš evattuiguin.