Sámi fágagirjjálaš foanda almmuha dán jagi čuovvovaš stipeanddaid sámi fágagirjjálaš čálliide ja jorgaleaddjiide:

1)   3 prošeaktastipeandda, dokumentára girjái giehtačálus, NOK 100 000.-

2)   4 mátkestipeandda, stipeandda árvu gitta NOK 20 000.- rádjái

3)   4 fágalaš artihkkaliid jorgalan/heivehan stipeanddat, gitta NOK 10.000,-  rádjái

4)   5 árvvoštallanstipeandda, árvvoštallat sámi oahpponeavvuid dahje dokumentáragirjjiid, á NOK 5.000.-

Dát gusto stipeanddaide:

1)  Ohcamii galgá ráhkadit dievaslaš prošeaktačilgehusa, ja áinnas duođaštus girjegoasttideaddjis ahte dat áiggošii ruhtadit ja almmuhit giehtačállosa go dat lea gárvvis.  

Foanddastivra vuoruha prošeavttaid/giehtačállosiid main fargga sáhttá ilbmat sámegielat girji dahje eará fágagirjjálaš teaksta. Prošeaktastipeandda sáhttá maiddái geavahit lassiruhtadeapmin. Ohcci galgá muđuid ge almmuhit ohcamušas jos prošektii lea ohcan dahje ohcamin doarjaga eará ruhtadeaddjiin. Sii geat ovdal leat ožžon stipeandda, eai sáhte ohcat ovdal dohkálaš raporta lea sáddejuvvon foandda stivrii. Foanda ii ruhtat dieđalaš dutkosiid gárvvistit. Foanddastivra várre gitta NOK 30 000.- stipeandagirjjiid deaddileapmái. Lágádus mii áigu almmuhit giehtačállosa, sáhttá ohcat deaddilandoarjaga.

Váilevaš dieđut dahket ahte ohcan ii meannuduvvo. Foanddastivra sáhttá hilgut buot ohcamiid, jos gávnnaha ahte ohcan omd. ii duhtat Fágagirjjálaš foandda ulbmiliid.

Juolluduvvon ruhta mákso guovtti oasis, bealli go álgá prošeavttain, ja nubbi bealli go lea loahpahan prošeavtta, ja giehtačálus gárvvis.

Jos eai leat dohkálaš prošeaktaohcamat, de sáhttet juolluduvvot eambbo mátkestipeanddat.

2)  Mátkestipeandda lea fágalaš mátkki várás. Vuostáiváldi galgá raporteret stivrii go mátki lea čađahuvvon, ja das galgá buvttaduvvot 5 siidosaš teaksta man sáhttá almmuhit Sámis áigečállagis.

3)  Jorgalanstipeanda lea eará gielain jorgalit sámegillii. Artihkkala galgá sáhttit almmuhit Sámis áigečállagis. Juolluduvvon ruhta mákso go artihkal lea jorgaluvvon, boahtán čállingoddái ja dohkkehuvvon.

4)  Oahpponeavvu dahje dokumentára girjji árvvoštallan galgá leat 3-5 siidosaš, ja sáhttit almmuhuvvot Sámis áigečállagis. Dan oažžu maŋŋá fállat eará almmuheaddjái. Juolluduvvon ruhta mákso go árvvoštallan lea gárvvis, boahtán čállingoddái ja dohkkehuvvon.

Eambbo dieđut SFSa čállingottis,

tel. 416 45 751 Svein, dahje 915 90 606, John Trygve.

Vuođuštuvvon ohcan oktan ruhtadanplánain sádde borgeemánu 15.8.2014 čujuhussii:

SFS/Sámi fágagirjjálaš foanda                dahje sádde e-poastačujuhussii

Fitnodatgeaidnu 13,                                               samifaga@samifaga.org