Artihkal girjjis Sámi skuvlahistorjá 2. Davvi Girji 2007.

Kárášjoga gymnásaoahppit rahčet buoret skuvlla ovddas

1969:s sáhtii viimmat Kárášjoga gymnásaluohkát sámegielain rahpat. Dát govva lea rahpamis. Gurut bealde: Synnøve Amundsen, Jon Eldar Einejord, Ivar Einarsen, Johannes Iversen, Åse Fagerberg, Andreas Njárga, Arne Lande. Ohppiid gaskkas oidnojit ee. Nils Peder Eriksen, Rávdná Anti ja Nils Henrik Måsø.
(Govva: Per Jernsletten)

1970-logus ledje ollu skuvlapolitihkalaš doaimmat máŋgga joatkkaskuvllas. Nu maiddái ođđa Kárášjoga gymnásas (Karasjok gymnasklasser med samisk). Dás serve oahppit moanat riikaviidosaš miellačájáhusaide, maid báidne sámi dovdomearkkaiguin. Mii bájuhit dás guokte dokumeantta mat čájehit dán doaimma.

Skuv'lavázzit Kárášjogas: Mii gáibidit æmbu ja buoret oappo-girjjid Sámi-gillii

Kárášjoga gymnása oahppit ja oahpaheaddjit akšunerejedje 24.11.1972. Sii ovdabukte dalle cealkkámuša sámegillii ja dárogillii. Sámegiel veršuvdna lea bajuhuvvon aviissas Ságat 1.12.1972:

Kárášjotoahppit gymnásalága vuostá

1970-logus ledje stuora rievdadusat Norgga joatkkaoahpahusas. Stuoramus rievdadus bođii joatkkaoahpahuslágain, mii mearriduvvui 1974:s ja biddjui fápmui 1976:s. Dáinna biddjojuvvojedje ovddes iešheanalaš skuvlašlájat, nugo gymnása, fidnoskuvla ja gávpeskuvla, oktii joatkkaskuvlan. Ovdal go láhka mearriduvvui gohččoduvvui dávjá "ođđa gymnásaláhkan".
Dát cealkámuš leat mii gávdnan Girko- ja oahpahusdepartemeantta arkiivvas, Riikkaarkiivvas. Dat čájeha ahte Kárášjoga gymnása oahpit lea searvan riikaviidosaš akšuvdnii, maid jáhkkimis Norgga Gymnasiastasearvi (Norges Gymnasiastsamband - NGS) lea álggahan, ja seammás sii leat ákkastallan sámi oahpahusaid beroštumiiguin.

Mii bájuhit dan juste nu go lea čállon. Oahppit ledje ieža čállán dokumeantta sihke sámegillii ja dárogillii ja dat speadjelastá dalá čállinvuogi, sátneválljema ja čálalaš sámegielmáhtu.

Resolušuvvna

Kárášjoga Gymnasa Sámegieláin
Kárášjågas

Oappilat Kárášjoga Gymnasa Sámegieláin mannet vuosta dan åđđa Gymnasalágá deina gå dat mieldisbuk'ta:
1) Dat sámi sisdoallo oappahusa siste unnu hir'bmadit gå 30 diimo vákkui buotta.
2) Ållašuvvun fábmolákká ad'da G.O.D.'ai stuorit fámo oappiliid ja oappaheddjid báddjel.
3) Ænet ja ænet rášuvna-ál'kahusat skuvlaid siste
4) Juokkelagán skuvlaid čåkkeju'bmi mieldisbuk'tá atte ænet oappilat šáddet ruovtuin eret fárret ja ålgubæl'de báikit masset nuoraid.
Dan ditte gái'bidit mii atte Gymnasalákká gessujuvvu ruovtuluodda.

Kárášjågas, 3.4.1974
Oappilat Kárášjoga Gymnasas Sámegieláin

Eará artihkkalat girjjis Sámi skuvlahistorjá 2