Ovdasiidogovva Bjørg Monsen Vars bokte

Girjji sáhttá oastit girjegávppis dahje diŋgot Davvi Girji -lágádusas.

Ovdasátni

Girjji sisdoallu almmuhuvvo maiddái interneahtas, čujuhusas http://skuvla.info. Interneahttaveršuvnnas leat muhtin lasáhusat mat eai čáhkan prentejuvvon girjái.

Girji lea máŋgga olbmo ja ásahusa ovttasbarggu boađus. Mii háliidit váimmolaččat giitit buohkaid, geat leat searvan dán bargui; čálliid, muitaleddjiid, jorgaleddjiid, korrektuvrralohkkiid, govvideddjiid, dáiddáriid ja lágádusa, girjerájuid, arkiivvaid, museaid ja skuvllaid bargiid. Erenoamážit giitit ásahusaid mat leat ruhtadan almmuheami. Daid gávnnat girjji loahpas.

Dáinna mii leat viiddidan sámi skuvlahistorjjá kártema ođđa guovlluide ja fáttáide. Dattetge lea dan mađe mii báhcá ahte mii áigut ráhkadit unnimusat vel ovtta girjji. Danin mii ain háliidit eanet muitalusaid ja dokumeanttaid.

Mii sávvat maiddái ahte sáddebehtet midjiide divodemiid ja liigedieđuid dán girjji hárrái. Dalle mii sáhttit rievdadit interneahttaveršuvnna ja maiddái boahttevaš prentehusa jos dat šattaš áigeguovdilin.

Erenoamážit mii sávvat divodemiid ja lassidieđuid sámegiel báikenamaide. Dán girjjis leat hui ollu báikenamat, ja vaikko mii leat rahčan gávdnat sámi báikenamaid, de leat ain muhtin báikkit, maidda leat ferten geavahit dušše dárogiel namaid vaikko jáhkkit ahte galggašedje gávdnot sámegiel namat. Interneahtas mii leat almmuhan listtu, mii čájeha sámi ja dáru báikenamaid mat leat geavahuvvon Sámi skuvlahistorjá-girjjiin, čujuhusas http://skuvla.info/baiki.htm . Skuvllain leat maŋimus áiggi rádjái almmolaččat leamaš dušše fal dárogiel namat. Mii eat dieđe man muddui sámegiel namat leat leamaš anus njálmmálaččat, eat ge man muddui skuvllat ođđaset áiggis leat ožžon almmolaš sámegiel namaid. Go skuvlanamat leat geográfalaš namat, de mii leat danin jorgalan daid. Almmolaš namat gávdnojit dalle buohtalagaid dárogiel teavsttas.

Artihkkaliid, cavgilemiid, cuiggodemiid ja divodemiid sáhtát sáddet lágádussii:
Davvi Girji
Postboks 13
N–9735 Kárášjohka
davvi@davvi.no
dahje váldodoaimmaheaddjái
sveilund@online.no

Dearvvuođat doaimmahusjoavkkus:
Elfrid Boine, Siri Broch Johansen, Svein Lund, Siv Rasmussen