Muhtimat geat givssiduvvojit dovdagohtet ahte sis iežanasas lea feaila. Sii soitet jurddahallat rievdadit iežaset vai eai givssiduvvoše. Muhto ii dárbbat rievdadit áššiid dego beroštumiid dehe mii sus lea nalde beare dan dihte ahte earát leat bahágurenat. Olbmos lea álot riekti vealtat givssideames.

Goas lea givssideapmi?

Lohkko givssideapmin jus máŋgii hárdojuvvo, uhkiduvvo, šaddá bogostahkan, časkojuvvo dehe loavkiduvvo. Givssideapmi sáhttet leahkit savkkuheamit, geahčastagat, boagusteapmi, nordamat, časkimat ja ilgadis sánit. Lohkko givssideapmin jus ii goassege oaččo leahkit mielde dehe soamis viiduda vearru beakkohusaid ovttaskasas.

Soaitá maid ahte soamis sádde ilgadis sms:aid dehe meilaid, čállá bahágurenis namuhemiid facebookas, bloggas dehe eará sajis neahtas. Dehe ahte soamis bidjá heajudeaddji govaid nehttii.

Jus soamis dadjá ilgadis áššiid dan dihte go gárvoda dehe lea dihto hámat dehe olbmos lea doaibmahehttehupmi, lea dat givssideapmi. Jus lea šaddan daid vuolážin, ja veadjigoahtá heajuid dan dihte, soaitá dárbbahit veahki vai dat nohká.

Muitalit givssideamis

Soaitá dovdot balesin muitalit soapmásii ahte lea givssiduvvon. Soaitá ballat ahte šaddá bahábun go muitala. Ovttaskas soaitá heahpanit go lea šaddan olggobeallái. Muhto ii leat dat gii givssiduvvo gii lea dahkan vearrut!

Jus givssiduvvo lea buoremus muitalit dan ja oažžut veahki bissehit givssideami. Sáhttá ovdamearkka dihte muitalit dan oahpaheaddjái, skuvlakuratorii dehe skuvladivššárii.

Soaitá leahkit buorre muitališgoahtit givssideamis soames ráves olbmui geasa luohtiha, ovdamearkka dihte soapmásii veagas, ja dasto váldit veahki dain muitalit dan soapmásii skuvllas.

Jus skuvla oažžu diehtit ahte oahppi dovdá iežas givssiduvvon, fertejit sii dakkaviđe váldit čielgasa mii lea dáhpáhuvvan. Sii fertejit maid dahkat buot ahte dat ii geardduhuvvo. Ráves olbmuin skuvllas  lea geatnegasvuohta geahččat bearrái ahte ii oktat oahppi givssiduvvo dehe uhkiduvvo. Lágas lohká ahte skuvlla vástu lea geahččat bearrái ahte ii giige givssiduvvo.

Buorre jurddahallat jus givssiduvvo:

  • Ii leat goassege nu ahte ferte sivahit iežas, jus givssiduvvo.
  • Leat leahkime lágat mat dadjet ahte ii oaččo givssiduvvot ovdamearkka dihte skuvllas dehe bargobáikkis.
  • Lea maid rihkus jus soamis uhkida soapmása, ovdamearkka dihte uhkida veagal dehe juohká govaid neahtas.
  • Skuvllat ja bargoaddit leat geatnegaccat geahččalit dahkat nu ahte buohkat dovdet iežaset dorvvolažžan.
  • Galgá váldit oktavuođa soames ráves olbmuin geasa luohtiha, ovdamearkka dihte váhnemii dehe soames earái gean dovdá.
  •  Sáhttá maid váldit oktavuođa skuvlakuratoriin dehe nuoraidvuostáváldimiin vai beassá sárdnut dehe oažžut ráđiid ja doarjaga.
  • Jus skuvla oažžu diehtit ahte oahppi dovdá iežas givssiduvvon leat sii geatnegaccat bearrái geahččat ahte dat ii joatkašuva.
  •  Jus ovttaskas givssiduvvo skuvllas iige oaččo veahki iežas skuvllas dalle sáhttá ilmmuhit dan Mánná- ja oahppiovddasteaddjái.
  • Váldde oktavuođa poliissain jus soamis viiduda govaid dus lobehaga. Dat lea rihkus persovdnadiehtolága vuostá. Heajudit dehe givssidit soapmása neahtas lea seamma lágahin go skuvlašiljus, gáhta nalde dehe friddjaáiggedálus.

» Givssideapmi