Kondoma sáhttá geavtit suodjin sohkabealedávddaid vuostá sierralágán seksas dego cinneanašeamis, bahtaráigeanašeamis ja jus lea njálbmeseksa cihpain. Cinneanašeamis dat suddje maid áhpehisvuođa vuostá.
Kondoma sáhttá maid geavtit jus hárjeha iešduhtadeami, jus dovdá ahte lea somá ja vai šaddá čeahppi bidjat dan nala ja diehtá mot dovdo oažžut sperpma kondomii.
Kondomat gávdnojit máŋgga sturrodagas, hámis, fearggas ja mágus. Eanaš kondomat mat gávdnojit oastit dábálaš gávppiin leat oalle seammalágánat, muhto neahtas ja bures sorterejuvvon seksagávppiin sáhttá gávdnat máŋggaid sturrodagaid ja hámiid.
Sierra sturrosaš kondomat heivejit sierra buoragit sierra cihpaide ja danin sáhttá leahkit buorre geahččaladdat vai gávdná kondoma masa liiko.
Eanas kondomat leat vuidon johtinávdnasiin vai dat leat vuohkkasat geavtit eaige ruvve.
Jus ii gierdda lateksa (gumme) sáhttá geavtit plásttas dahkkon kondomaid.
Got geavtá kondoma?
Kondoma biddjojuvvo cihppii mas lea erokšuvdna dehe seksaájanassii. Vai kondoma galgá suddjet sohkabealedávddaid ja áhpehisvuođa vuostá lea dehálaš ahte dat lea nalde olles anašeami áigge.
Jus golggus boahtá kondomii galgá leahkit várrogas go geassá cihpa olggos vai sperbma ii goaikko cinnái dehe bahtaráigái.
Soaitá dárbbahit hárjehallat bidjat kondoma njuolga ládje. Jus ovttaskasas lea cihppa sáhttá hárjehallat bidjat dan nala go iešduhtada. Jus ii leat dat sáhttá geavtit ovdamearkka dihte dildu dehe rušppi mainna hárjehallá.
Ná don bijat kondoma ovdamearkka dihte cihppii dehe dildui:
- Raba kondomabáhka.
- Rulle kondoma veháš nu ahte oidno man guvlui dan galgá rullet.
- Jus kondoma bidjo cihppii galgá dat leahkit garas go kondoma rullejuvvo.
- Jus lea ovdanáhkki dan ferte geassit maŋos.
- Bija kondoma návleoaivvi geahčái, deatte suorpmaiguin lihti seamma áiggi go kondoma rullejuvvo vulos nu ahte ilbmi ii beasa cihpa dehe dildu ja kondoma gaskii.
- Go kondoma rullejuvvo aivve vulos, jođit dalle kondoma bajás vehá ja gease vulos dassážiigo ii leat miige rullemuš. Jus kondoma lea cihpas galgá geassit dan eret ovdalgo erokšuvdna lea luoitán. Doala kondoma birra cihppamáddagis, go cihppa gessojuvvo olggos, nu ahte kondoma ii gahča.
- Bálkes kondoma ribaide. Ale doidde dan vulos hivssetráigái.
Gos gávdná kondomaid?
Kondomat juhkkojuvvo dehe vuvdojuvvo nuoraidvuostáváldimis.
Gávdnojit maid oastit e.e. apotehkas, biebmogávppiin, kioskkain ja neahtas. Kondomat vuvdojuvvojit maid automáhtain biográfain, restoráŋŋain ja kluppiin. Stuorit kondomavariašuvnnat gávdnojit bures sorterejuvvon seksagávppiin ja neahtas.
Maid kondomat mákset?
Kondomat vuvdojuvvojit dávjá báhkas mas leat máŋga. Olugo dat mákset molsasaddá ja vuolgá das makkár sorttat kondoma vállje ja gos daid oastá. Nuoraidvuostáváldimat lávejit juohkit kondomaid nuvttá dehe vuovdit hálbbibui.
Man sihkkar kondoma lea?
Kondoma lea sihkkaris suodji sihke sohkabealedávddaid ja áhpehisvuođa vuostá jus dat gevtojuvvo njuolga ládje, ja olles áiggi go anaša ja juohke geardde go anaša.
Kondoma galgá seailluhit viessolieggasis ja báikkis gos dat ii ruvvasuva juoga vuostá. Buorre báiki gos sáhttá atnit lea reddjolumma dehe veasku.
Heajos báikkit leat maŋŋelumma dehe čuvges lásegárpmas. Boares dehe goikan kondoma beđđo álkibut.
Oavddut
- Buorre suodji sohkabealedávddaid vuostá
- Sihkkaris suodji áhpehisvuođa vuostá
- Ii váikkut gorudii
Heajos bealit
- Soaitá leahkit unohas momeanta daningo galgá bidjat easka go lea ožžon erošuvnna.
- Ferte huolahit ahte dat leat lahkosis go háliida anašit.
- Soaitá dárbbahit hárjehallama ovdalgo lea álki bidjat dan nala ja orro vuogas atnit dan.