Na, miison duođaid dáhpáhuvvá jus deaddilat máidnosa mii ain iđista spealadettiin iežat favorihttadihtorspealu? Okta ášši goit lea čielggas: Vejolašvuohta vuoitit iPod lea oalle unni. Muhto vejolašvuohta ahte sii geat ovddasvástidit máidnosis registrerejit du dihtora čujuhusa ja guđđet diehtokapsela vai sáhttet heivehit iežaset máidnosa justa dutnje, lea oalle stuoris.
Juonalaš goansttat
Máidnosat leat juohke sajis ja juohkeláganat. Dávjá leat čielgasat, ovdamearkka dihtii go ihtet dego máinnosplakáhtan dahje popup-ruktan go leat Interneahtas. Dalle dieđát maid máinnustit. Muhtumin sáhttá máinnus leat oaidnit dego neutrála diehtun. Dalle fertet leat kritihkalaš ja geahččat dárkilit ádden dihtii ahte dát lea máinnus. Eará háviid leat máinnus ráhkaduvvon dego somás neahttasiidun spealuiguin. Dalle it dáidde jurdilit ahte speallu rievtti mielde lea oaivvilduvvon máinnusin.
Nuvttá prográmmat, gos beasat speallat, tevdnet dahje eará suohttasiid dahkat, sáhttet muhtumin sisttisdoallat spiovdnaprográmmaid dahje virusiid mat vahágahttet du dihtora. Soaitá dihtor njoahcu, dahje earát fáhtejit du sisabeassansániid dahje stivregohtet du webkamera. Dákkár prográmmaid sáhttá leat váttis fuobmát ja jávkadit.
Nuvttá?
Don dahje muhtin du ustibiin dáidibehtet leat leamaš mielde jienasteamis giehtatelefovnna bokte, dahje lehpet miehtan oažžut ođđa riŋgenšuoŋaid giehtatelefovdnii. Olusat dadjet jo áššiide mat orrot leamen nuvttá. Go dal de telefonrehket boahtá eadnái ja áhččái, de fuobmát ahte dat han dattetge mávssii. Dávjá mearkkaša jo eanet go maid navddát, ovdamearkka dihtii leat mieđihan oastit olu riŋgenšuoŋaid juohke mánus vaikko don dušše ostet ovtta riŋgenšuoŋa. Dalle guorrana kontántakoarta oalle jođánit.
Don dat mearridat masa don áiggut geavahit iežat áiggi ja iežat ruđa.
Gáldu: Du bestemmer