Jus don háliidat almmuhit govaid iežat ustibiin Internehttii, de fertet vuos jearrat lobi. Jus dus lea gova geas nu iežat giehtatelefovnnas man háliidat sáddet earáide, de fertet maiddái vuos jearrat lobi. Vaikke vel du mielas lea hearvás govva, de ii soaitte du ustit leat ovttaoaivilis.
Álki boastut áddet
Dihtora ovddabealde ruovttus lanjas ii oro buot nu váralaš go doppe olgun dan “duohta” máilmmis. Sáhttá leat álki dadjat áššiid maid it livčče dadjan jus livččiidet leamaš njunnálagaid. Sáhttá maiddái leat álki boastut áddet nuppi. Go don háleštat boallobeavddi bokte, de it oainne nuppi olbmo dávástusaid. Don it gula jiena itge oainne su ámadaju itge su rumašgiela. Danne sáhttá leat váttis diehtit mo earát dávistit dasa maid don čálát.
Interneahtta ja giehtatelefovnnat addet dutnje stuorra vejolašvuođaid háleštit ustibiiguin buot dan birra mii dáhpáhuvvá, juohkit govaid ja soaittát vel muitalit čiegus áššiid. Dađi bahábut addá dat maid vejolašvuođaid bilidit earáid ovddas. Muhtimat vásihit ahte sin buoremus ustit sádde viidáset govaid maid eai lean oaivvilduvvon earáide čájehit. Muhtimat vásihit ahte oahppit skuvllas čállet fasttes áššiid sin birra Interneahtas. Muhtimat gávdnet unohis govaid alddiset earáid ruovttusiidduin.
Seamma njuolggadusat
Mii galgat árvvus atnit earáid oaiviliid ja dovdduid, beroškeahttá das leat go mii skuvlašiljus, sáddemin dieđuid giehtatelefovnnain dahje čohkkámin dihtora ovddabealde. Ja seamma njuolggadusat gustojit juohke sajis – maiddái Interneahtas. Ii leat ovdamearkka dihtii ortnegis čállit giellásiid earáid birra. Iige leat lohpi givssidit nuppiid.
Dus dat lea ovddasvástádus buot das maid bijat nehttii, sihke govaid ja teavstta. Dus dat lea ovddasvástádus dieđuin maid sáddet iežat giehtatelefovnnain. Dus dat lea ovddasvástádus jurdilit erenoamáš bures nuppes ovdalgo deaddilat enter dahje sádde.
Dus lea ovddasvástádus iežat ja iežat daguin – maiddái neahtas.
Gáldu: Du bestemmer