Dát dáhpáhus dutkan [case study] lea vihtta Norggabeale sámi nissonolbmo eallinmuitalusaid vuođul maŋŋel go sii leat Amerihkkái fárren, ja dát dutkan teoretisere fárrema ja dan čuovvovaš sámi-amerihkálaš subjektivitehta, geavahettiin dan ođđa doahpaga - sirddolašdilis álgoálbmotidentitehta [diasporic indigenety]. Ávnnasvuđot bearaškultuvra, duodje- ja dáiddalaš barggut ja čállosat leat mávssolaččat muitimii ja kultuvrralaš áddejumi oažžumii. Sámi-amerihkálaš oktavuođas dávjá gávdnojit unnán dakkár ávnnaslaš kulturseailluheaddjit – ja danin muitaleapmi lea deháleamos oassin sirddolašdilis álgoálbmotidentitehtas. Dán dutkamis leat guokte ulbmila: 1) čájehit ja reflekteret das ahte bearaš- ja báikegottiid muitaleamit leat mávssolaš oasit njálmmálaš árbevierus sirddolašdilis álgoálbmotidentitehtas sámi-amerihkálaš oktavuođas; 2) suokkardallat spesifihkka sámi metodologiijaid viiddit álgoálbmot dutkanmetodologiija rámmaid, álgoálbmot etihka ja álgoálbmot dulkoma siskkobealde, gos njálmmálaš muitaleamit leat oassin golmma medias: čállosiin, govain ja videoin. Artihkkalat čájehit metodologalaš lahkonanvuogi narratiivadutkamii, mii geavaha doahpagiid sámegillii paradigmas, mii lea oassin álgoálbmot muitalanárbevieru epistemologiijas. Dutkanságastallamat main lea oktasašvuohta ja sohppojuvvon ipmárdus (intersubjektiivvalaš dutkanságastallamat) ja eallinmuitalusat mat leat ovttasbarggu bokte buvttaduvvon, dulkojuvvojit áigái- ja báikáičadnon muitaleami rámma siskkobealde. Dán rámma siskkobealde sámi sisafárrejeaddji nissonolbmot čadnojuvvojit dáláš muitalusaid bokte báikkiide Amerihkás ja báikkiide Sámis; dasa lassin dát muitalusat čatnet oktii vássánáiggi mii dávjá lei jávohuhtton ja čihkkojuvvon, dálááiggiin- mii lea rabas, ipmirdahtti ja oaidnoguoddi. Dutkamuš lea oassin dáláš Atlánta-meara rasttildeaddji ovttasbargoprošeavttas gos eallinmuitalusat galget almmuhuvvot máŋgga mediaide, nu go digitálalaš čállosiidda, govaide ja videoide web-vuđot interaktiivvalaš vuogádagas. Dán oasis dan dáláš prošeavttas, lea jurddašuvvon ahte teaksta galggašii almmuhuvvot almmolaččat lohkkiide golmma gilli, mainna lea ulbmil ollašuhttit sávaldaga álgoálbmotdutkamis juohkit dieđuid ja máhtuid mat leat buvttaduvvon ovttasbarggu bokte, iešguđetge báikegottiiguin, olahahtti ja ipmirdahtti vugiin buohkaide, báikkálaččat.