Ávvudalli gå Divtasvuodna juogeduvvá
Uddni diededuváj vuona oarjjeallebielle sjaddá oassen Hábmeris. NSR:a sámediggeájras ja åvdep sámediggeráde Ann-Mari Thomassen ávvus ådåsijs.
NSR:a sámediggeráde oajvvadij jagen 2016 Nordlánda fylkkamánnáj ja ráddidussaj Divtasvuonav juohket.
– Dálla la ráddidus tjuovvum rádijt ma NSR-rádes dijmmá båhtin, ja álmmukberustimev mav allebiele álmmuk álgij. Uddni la ávvobiejvve julevsáme giellaj, kultuvrraj ja varresvuohtafálaldahkaj dálla gå julevsáme guovllo nanniduvvá.
– NSR doarjju Divtasvuona juohkemav, valla galggap aj mujttet årru sáme aj dan bielen mij dálla galggá sjaddat oassen Áhkánjárgas ja Bálágis. E galga oadtjot væráp fálaldagáv juohkema diehti, ja ådå suohkan Áhkánjárgga-Bálák-Divtasvuodna hæhttu sjaddat oassen sáme giellaháldadimguovlos.
NSR miejnni sáme berustime galggi liehket oassen suohkanådåstusá árvustallamis. Thomassen sihtá mujttádahttet ij la ájn tjielgas gåktu galggá sjaddat nav gåhtjodum ETS-suohkanijda Evenássje, Dieldanuorre ja Skáne.
