Kirsti Guvsám: Sihtá ielle sámestádaj
Kirsti Guvsám, Oarjje-vuodna válggaguovllo NSR áirrasa ja 1. kandidáhta, le álu Oslon. Juohkka bále gå dåhku boahtá de åhtsål æjvvalimsajev gånnå máhttá guorrit. Sadje gånnå máhttá ietjá sámijt iejvvit. Mav sávvá, le æjvvalimsadje gånnå sáme stádavaljesvuohta luluj luorkijdit.
Kirsti Guvsám. Oarjje-vuodna válggaguovllo NSR áirrasa ja 1. kandidáhta.
Javladuvvá Oslo le dat stáda gånnå ienemus sáme årru. Ajtu ij sámevuohta heva dáppe vuojnnu. Dájna sihtá Kirsti Guvsám juojddá dahkat.
– Galggá liehket sadje sábmen liehket vájku stuorra stádan årru. Vuona stáda hæhttuji dilev láhtjet ielle sáme sebrudagájda. Galga bessat bajássjaddat sáme identitehtajn dáppe aj, miejnni sån.
Guvsám iesj årru tjáppa sajen Bud Nuortta-Vestlándan. Mánnávuodan lij ålov Divtasvuonan Nordlándan gåggu sámevuohta le nanos. Suv mielas le sáme arena binnemusát sæmmi luondulasj Oslon ja Biergunin dagu Divtasvuonan.
– Vuoj jus miján luluj sáme kulturviesso, ja maŋenagi sáme ”sijdda” Oslon. Sadje gånnå luondulattjat máhttá guorrit, gånnå uvsa li rahpasa juohkka biejve. Dåppe besa iejvvit barggijt gudi berusti, ij dåssju luojvojbargge gudi dugnada baktu hæhttuji sáme stádakultuvrav låpptit muhtem lávvodagá duolloj dálloj, ájádallá sån tjavgga. Viesso gånnå máhttá liehket giellaguovdásj, kafea, duodjevuobddem ja sáme kultursiedna. Luondulasj sáme æjvvalimsadje.
– Valla dåj ietjá stuorra stádajn dárbahi aj sajev gånnå sáme bessi æjvvalit. Arena gånnå sáme kultuvrra vuojnnusij boahtá. Duola dagu sáme vahkko Biergunin, oajvvat Kirsti.
Diedo sámij birra
Ietjas bargos Oslo sámesiebren måttij jagij tjadá, gånnå lij duola dagu jådediddjen muhtem ájge, vuojnná Kirsti aj stuorra dárbbo le diedojda sámij ja sámij ássjij birra. Dát luondulattjat gullu oassen sáme vieso dåjmas oajvvestádan.
– Ienebu ja ienebu gatjádalli sámij ja sámevuoda birra. Dákkir diedo e uddni heva gávnnu. Álu le Oslo sámesiebrre ja ájnegis ulmutja hæhttum diedojt vaddet vájku dát ajtu le almulasj åvdåsvásstádus, tjielggi Kirsti.
– Uddni hæhttu tjielgga snuoggat jus galggá vuogas diedojt gávnnat sámij birra, dættot sån sjuohkkanisátjijn.
Lagáp aktisasjbarggo
Kirsti vuojnná ållo galggá sajenis åvddål dákkir vijdes sáme fálaldahka jåhtuj boahtá oajvvestádan. Ienemusát le ruhtadime duogen. Sihke ráddidus, Sámedigge ja suohkan hæhttu dási sæbrrat. – Sámedigge hæhttu sierraláhkáj barggat váj suohkana ållåsit válldi åvdåsvásstádusáv sáme ássjijs ja buorep fálaldagáv sáme álmmugij fállat. Aktisasjbarggo suohkanij ja Sámedikke gaskan luluj buorre viehkkenævvo jus galggá dav nahkat, jáhkká Kirsti Guvsám.
– Hæhttup aktisasjbarggoguojmijt åhtsåt. Galggap barggat váj oadtjop Oslo ja Biergun suohkanijt ja ietjá stádasuohkanijt dákkir sjiehtadusájt vuollájtjállet, loabet NSR-politihkkár. Guvsám le læhkám Sámedikken 2005 rájes ja dálla le gierddamahttásin sjaddamin. Fylkkasuohkana ja joarkkaskåvlå lulu ietjá aktisasjbarggoguojme jáhkká sån.
– Sámevuohta ruvva gáhtu gå stádajda jåhtå. Dajna hæhttu juojddá dahkat. Hæhttup gierkkamis ráhpuj ájádallat. Galggá bessat sábmen liehket ja oadtjot fálaldagáv vájku gånnå årru ja vájku makkir dárbo dujna li, lehkus dal mánájgárde jali vuorrasijsijda birra sáhka, tjuottjot Kirsti Guvsám.
