Samedigge le giesen 2012 gehtjadam 330 tsiekkadusájt prosjevtan ”gehtjadibme ja registrerim sáme tsiekkadusájs”.
Jagen 2011 Sámedigge álgadij, aktan Rijkaantikvárajn, registrerimprosjevtav sáme tsiekkadusájs. Barggo álgaduváj sæmmi båttå nuorttasáme-, márkkosáme- ja oarjjesáme guovlon. Prosjækta galggá gehtjadit, tjáledit ja dilev árvustallat automáhtalasj suodjalum ja ådåp sáme tsiekkadusájn. Tjuovvovasj suohkanijn gehtjadime tjadáduvvin: Grane, Hattfjelldal, Skádne, Dædno ja Oarjje-Varanger.
Dájn 3-jahkásasj prosjevta baktu ájggu sámedigge registrerit sáme tsiekkadusájt ma li vuorrasabbo gå 100 jage ja dan diehti automáhtalattjat suodjalum ålles Vuonan.
Sáme kultuvrra ja diehtoguodde
-Dålusj sáme gådijn li moadda kvalitehta ma li ájnnasa várajválldet. Da subtsasti histåvråv sáme kultuvra ja identitehta birra, ja dan diehti le ájnas registrerit ja bisodit sáme tsiekkadusájt, javllá prosjæktajådediddje Mia De Coninck. Dá tsiekkadusá li ájnas kulturárbbe, ja bierriji nanniduvvat sáme kultuvrra ja diehtoguodden, javllá De Coninck.
Sámedikke prosjæktajådediddje Mia De Coninck javllá siján le læhkám buorre aktisasjbarggo goahteæjgádij giese gehtjadimijn. Lip gullam moadda mielagiddis subttsasijt tsiekkadusáj birra. Ja lip iejvvim moadda æjgádijt gudi li tsiekkadusájt bisodam. Goahteæjgáda sjaddi oadtjot girjev tjadádam gehtjadime birra javllamánon 2012. Dan baktu hasoduvvi joarkket bisodimev dájs tsiekkadusájs, mij buoremusát dagáduvvá dábálasj ano baktu aktan gehtjadimijn ja ájmonanedimijn duolla dálla. Jus le dárbbo åbddimbargguj tsiekkadusán dát galggá dagáduvvat aktisasjbargujn Sámedikkijn.
Gehtjadam 330 tsiekkadusájt
Sámedigge le dálátjij låhkåm 130 skiejá, 70 goade, 24 fievse, 8 ednamtjællára ja 3 gámá. Skiejájn li læhkám duot dát adnoulmme ja moattelágásj konstruksjåvnå. Máhtti liehket gæhppada ja ilmmega jali låssåda ja divtuga. Da tjuodtju stålpaj nanna jali gierggehårij nanna. Gådijs li ájn ienep variánta, 1, 1 ½ jali 2 etásja, 2-lanjá, 4-lanjá, dimmbaris dagádum, panelaj jali ij. Divna slája tsiekkadusá subtsasti ietjas láhkáj sáme adnoguovlo birra.
Diedo ja tjállaga ma li tjoahkkidum dáj tsiekkadusáj birra galggi Askeladdenij biejaduvvat, Rijkaantikvára nasjonálalasj kulturmujto diehtobássaj. Danna máhtá åhtsåt tjuovvovasj næhttabielen http://www.kulturminnesok.no/
Åhtsi æjgádijt ja diehtovaddijt
Sámedigge ájggu gehtjadit Råmså ja oarjjelsáme guovlon boahtte jage.
Æjggu gus dån oabme sáme tsiekkadusáv jali le dujna bájkálasj diehto sáme tsiekkadusáj birra ja ájgo oassálasstet dájna, de máhtá Sámedikkijn guládallat. Rádjala gåvåv ja diedov tsiekkadusáj birra, subtsas prosjæktajådediddje Mia De Coninck.
Prosjæktajådediddje Mia De Coninck, tel. 78 47 40 23, mobijlla 90 79 98 19, e-poassta:
mia.de.coninck@samediggi.no
Prosjæktaguojmmebargge Elin Kristina Jåma, tel. 78 47 40 34, mobijlla 94 82 59 78, e-poassta:
elin.kristina.jama@samediggi.no
