Sáme Giellagálldo tjoahkki sámegiela ássjediehttijt Anárij, gålgådismáno 6. biejve ja gåhttju giellaaddnijt seminárraj Sajosij ságastalátjit makkár rahtjamusá li nielje sámegielajn mij gullu giellasuodjalibmáj, normerimij ja moallánakbargguj. Sæmmi båttå besa gullat niellja sierra sámegiela.
Giellasemináran tjalmostahteduvvá Sámedikke gålmåjahkásasj rádjárasstididdje giellaaktisasjbarggoprosjevta álgadibme. Suoma Sámedikke sáhkajådediddje, Tiina Sanila-Aikio, rahpá seminárav. Giellagáldo joarkkemprosjevta álgadimseminárra l rabás juohkkahattjaj. Oassálasste máksi ietja manno-, biebbmo- ja idjadimgålåjt. Seminárra dålkkuduvvá sámegielajs suomagiellaj ja svierigadárogiellaj.
Buoris boahtem!
Prográmma
9.30 Káffa
10.00 Álggobágo Sáme Parlamentáralasjráde åvdåstiddjijn/ Suoma Sámedikke sáhkajådediddjijn Tiina Sanila-Aikio
10.15 Vuona Sámedikke presidænnta Aili Keskitalo
10.30 Eino Koponen: Prinsihpa giellasuodjalimbargon ja hiebadibme gålldåsámegiellaj
11.10 Johanna Ijäs: Tjoahkkájbiejadum bágo nuorttasámegielan ja daj tjállemvuohke
11.50 Sáme Åhpadusguovdátja sámemusihka oahppij vuosádus auditåvrån
12.30 Biebbmo
13.30 Petter Morottaja: Gåktu bisodit Anára sámegielav?
14.10 Svenn-Egil K. Duolljá: Muhtem giellaåhpalasj njuolgadusá julevsámegielan giellamierredime hárráj
14.50 Marko Marjomaa: Giellagáldo–prosjækta
15.00 Låhpadibme
Ånigattjat prosjevta birra
Sáme Giellagálldo l sáme álmmuga aktisasj ja bajemus ássjedåbdde ja mierredimorgádna mij guosská sámegielaj gatjálvisájda. Sáme Giellagálldo fállá giellaviehkev njuolgga giellaaddnijda. Sáme Giellagáldo bargguj gullu aj moallánakbarggo, giellamierredibme ja giellasuodjalimbarggo. Duodden dási galggá Giellagálldo juohket diedojt sámegielaj birra ja giellafágalasj ássjij birra.
Giellagáldo joarkkemprosjækta ruhtaduvvá Interreg V Nord -oasseguovllo Nuortta Sábme, Lapin Liitto, Råmså fylkkasuohkan ja Suoma -, Svieriga - ja Vuona Sámedikkijs. Prosjækta jådeduvvá Suoma Sámedikkes.