Juojggamgilppusijn ájggu Sámediggi, aktan NRK Sámijn, tjalmostahttet ja låpptit juojgav ja sáme gielajt. Gilpos la oassen sáme giellavahkos 2019
– Gájka gudi sihti máhtti juojgav jali vuolev giellalåpptimij biedjat, javllá Sámedikke giellaåssudagá direkterra Anne Britt K. Hætta.
Juojgga galggá gåvvidit sámegielajt, sáme sebrudagá gielladilev jali giellalåpptimav tjalmostahttet.
– Vuolláj ja juojggaj la tjanádum sáme giella, kultuvrra ja sáme árbbedábe. Dan diehti li da ájnnasa giellalåpptimin, javllá Hætta.
Dån máhtá juojggat, tsoabbmot, ármmadit jali ådjådit. Galggá liehket árbbedábálasj juojgga musihka dagá.
Vuojtto l 20.000 kråvnå vuojttojuojggaj.
Juojgga ij galga vihpat guhkep gå gålmmå minuhta.
Ájggemierre oajvvadusáv gilppusij sádditjit la sådnåbiejve gålgådismáno 6. biejve.
Gålgådismáno 7. ja 8. biejvij válljiduvvi juojgajt ma gilppusij bessi.
Válljidum juojgajt almoduvvi gålgådismáno 9. biejve. Dan maŋŋela la máhttelis gulldalit ja jienastit nehtan dav masi buoremusát lijkku. Jienastibme vihpá gålgådismáno 16. bæjvváj.
Vuojttojuojgga almoduvvá gålgådismáno 22. biejve.
Náv sáddi juojgav gilppusij
Dån dagá juojgav jali vuolev, juojgga ij galga åvddåla almulattjat gullum.
Filmmi ietjat giehtatelefåvnåjn gå juojga jali tsoabmo.
Maná dán adræssaj ja sáddi videofilmatjav dán adressa baktu: https://bidra.nrk.no/joik
Jus li gatjálvis, de máhtá aktijvuodav válldet Sámedikke giellaåssudagá direkterrajn Anne Britt K. Hætta + 47 78 48 42 91, jali fáhkajådediddjijn Per Johannes Marainen, +47 78 48 42 78.