Guhtimusj bierri vuojttet Sámedikke giellaarvusmahttembálkkáv? Juohkka nælját jage juogat Sámedigge bálkkáv ulmutjij jali viddnudahkaj, prosjæktaj jali organisasjåvnnåj gut la vissjalit barggam sámegielajn mij gullu giellanannimij, åvddånibmáj jali bisodibmáj.
Bálkká ij juogeduvá Sámedikke ájrrasijda jali háldadussaj. Bálkkán juogeduvvá 50.000 kråvnå ja duodden dájddadiploma.
Gájkka bessi májnodit gut viertti oadtjot giellaarvusmahttembálkkáv. Tjielggi ånigattjat ietjat oajvvadusá birra ja sáddi Sámedikke åssudahkaj åvddål sjnjuktjamáno 15.bve.
Sámediggeráde mierret gut galggá bálkkáv oadtjot. Giellaguddnebálkká juogeduvvá Sámedikke ållestjåhkanime aktijvuodan, biehtsemáno.